सौदी कुटुंबाला विकलेली पंजाबी महिला परतली

अमृतसर

सौदी अरेबियात घरकामासाठी गेलेली एक पंजाबी महिला तिथे एका वेगळ्याच संकटात सापडली. एका परिचारिकेमुळे आणि सोशल मीडियामुळे तिच्या कुटुंबाला कळलं की तिचा छळ होतोय. तब्बल ५ महिन्यांनंतर तिची सुटका झाली.

त्याचं झालं असं, सुखवंत कौर (५५) या महिलेला नवऱ्याला आर्थिक हातभार लावण्यासाठी आणि घराचं कर्ज फेडण्यासाठी नोकरी करायची होती. जानेवारीत एका ट्रॅव्हल एजंटने तिच्याकडून परदेशात नोकरी लावून देण्यासाठी ४० हजार रुपये घेतले. या ट्रॅव्हल एजंटने सुखवंतला सौदी अरेबियातील एका कुटुंबाला साडेतीन लाख रुपयांना विकले. सुखवंत तिकडे गेली, पण तिचा अतोनात छळ होऊ लागला. ती सकाळपासून रात्री उशिरापर्यंत काम करी, तिला उपाशी ठेवले जाई, तर कधी ती शाकाहारी असूनही मांस खायला लावले जाई. परिणामी ती आजारी पडली. तिला रुग्णालयात दाखल करण्यात आले.

बुधवारी सौदी अरेबियाहून मुंबईला आल्यावर ती टाइम्स ऑफ इंडियाशी बोलताना म्हणाली, 'रुग्णालयात केरळची एक नर्स होती, तिला माझा त्रास लक्षात आला आणि तिने माझ्या कुटुंबाशी संपर्क साधला.' सुखवंत पंजाबच्या जालंधर जिल्ह्यातल्या अजतनी गावात राहते. तिचे पती कुलवंत सिंग यांनी सांगितले, 'सुरुवातीला ती मला रोज फोन करत होती, पण नंतर तिचे फोन येणं बंद झाले आणि आम्ही काळजीत पडलो. ७ मे ला मला युएईच्या रुग्णालयातून फोन आला, तेव्हा तिच्याविषयी कळले. मला माझ्या मित्राने ट्विटरवरून परराष्ट्र मंत्री सुषमा स्वराज यांना मेसेज करण्याचा सल्ला दिला. त्यांनी त्वरित प्रतिसाद दिला आणि २४ दिवसांनंतर माझी पत्नी भारतात परतली.'

सुखवंत सौदी अरेबियातल्या भारतीय दूतावासाच्या मदतीने भारतात परतली, कारण तिच्याकडे एकही पैसा नव्हता. तिचे डोळे पाणावले होते. तिच्या मुलीने रणजीत कौरने सांगितले की तिच्या आईला असं वस्तूसारखं विकलं जाईल असं त्यांना स्वप्नातही वाटलं नव्हत. दरम्यान, त्या एजंट पुजा हिला मुंबई पोलिसांनी ताब्यात घेतले आहे.

Sukhwant Kaur has reached Mumbai. pic.twitter.com/dOackhptw0 — Sushma Swaraj (@SushmaSwaraj) May 31, 2017  ही बातमी इंग्रजीत वाचा