‘राफेल कराराचे पैसे पंतप्रधानांच्या खिशात’

नवी दिल्ली: पंतप्रधान नरेंद्र मोदी यांच्यावर थेट हल्ला चढवत राफेल कराराचे पैसे मोदींच्या ‘थेट खिशात’ गेले असल्याचा घणाघाती आरोप काँग्रेसने गुरुवारी केला. राफेल करारात झालेला भ्रष्टाचार चव्हाट्यावर आणण्यात आपला पक्ष घाबरणार नाही, असे काँग्रेसचे प्रवक्ता आरपीएन सिंग यांनी म्हटले आहे.

काँग्रेस सरकारविरोधात आंदोलन करणार असून, त्यासाठी एक महिन्याची योजना आखली आहे. या महिनाभरात पत्रकार परिषदा घेण्यात येणार असून प्रत्येक जिल्हा आणि राज्याच्या मुख्यालयांमध्ये आंदोलन केले जाईल, असे सिंग यांनी म्हटले. ते म्हणाले, ‘ज्या राफेल करारावर सह्या झाल्या आहेत, त्या कराराचे लाभ पंतप्रधानांच्या थेट खिशात गेले आहेत. हे आम्ही सर्व देशासमोर उघड करू.’ ‘यामुळेच पंतप्रधान राफेल करारावर निवेदन करण्याऐवजी उद्योगपतींना बरोबर घेऊन माध्यमे आणि आमच्या नेत्यांना घाबरवण्याचा प्रयत्न करीत आहेत. मात्र, काँग्रेसच्या नेत्यांना कोणाचीही भीती नाही आणि मी तुम्हालाही सांगतो, की तुम्हीही कोणाला घाबरू नका,’ असे सिंग म्हणाले.

१३० कोटींचा राफेल करार एका बड्या उद्योगपतीच्या पदरात टाकण्यात आला. त्याने केवळ १२ दिवसांपूर्वीच कंपनी सुरू केली होती, असा दावा त्यांनी केला.