rafale 'राफेलसंदर्भातली कागदपत्रे चोरीला गेली नाहीत'

नवी दिल्ली:

राफेल करारासंदर्भातली कागदपत्रे संरक्षण मंत्रालयातून चोरी झालेली नसल्याचा दावा महाधिवक्ता के. के. वेणुगोपाल यांनी आज केला. बुधवारी वेणुगोपाल यांनी सर्वोच्च न्यायालयात सांगितले होते की राफेल करारासंदर्भातली महत्त्वाची कागदपत्रे हरवली आहेत. मात्र आता याचिकाकर्त्यांनी कोर्टात ही कागदपत्रं नव्हे तर त्यांच्या फोटोकॉपी सादर केल्या, अशी सारवासारव वेणुगोपाल यांनी केली आहे.

राफेल करारासंदर्भातली कागदपत्रे चोरीला गेली या वेणुगोपाल यांच्या दाव्यानंतर विरोधकांनी सरकारवर टीकेचा भडीमार केला होता. राफेल कराराविरोधात सर्वोच्च न्यायालयात प्रशांत भूषण आणि यशवंत सिन्हा यांनी जी याचिका दाखल केली होती, त्यात कागदपत्रांच्या प्रती होत्या, असं आता वेणुगोपाल सांगत आहेत. ही कागदपत्रे गोपनीय असतात, मात्र फोटोकॉपीज काढल्यामुळे ती सार्वजनिक झाली असा युक्तीवाद वेणुगोपाल यांनी केला होता.