Rafale jet in India: 'राफेलचे स्वागत, मात्र किंमत १,६७० कोटी रुपये कशी?'

नवी दिल्ली: भारताच्या युद्धसामग्रीत भार टाकत भारतीय हवाईदलाची क्षमता वाढवणारी ५ राफेल लढाऊ विमाने आज बुधवारी भारतात दाखल झाली. काँग्रेस पक्षाने या विमानांचे स्वागत केले आहे. मात्र हे स्वागत करत असताना काँग्रेसने मोदी सरकारला थेट प्रश्नही विचारला आहे. ५२६ कोटी रुपयांचे राफेल लढाऊ विमान १ हजार सहाशे सत्तर कोटी रुपयांत का विकत घेतले गेले असा प्रश्न विचारला आहे. हा प्रश्न प्रत्येक देशभक्ताने विचारला पाहिजे, असेही काँग्रेस पक्षाने म्हटले आहे. या संदर्भात काँग्रेस पक्षाचे मुख्य प्रवक्ते रणदीप सुरजेवाला यांनी ट्विट केले आहे. राफेलचे भारतात स्वागत आहे! हवाई दलाच्या शूर योद्ध्यांचे अभिनंदन, असे सुरजेवाला यांनी आपल्या ट्विटमध्ये म्हटले आहे. त्यानंतर त्यांनी काही प्रश्न उपस्थित केले आहेत.

सुरजेवाला आपल्या ट्विटमध्ये प्रश्न विचारतात, आज प्रत्येक देशभक्ताने हे विचारायलाच हवे- २५६ कोटी रुपयांचे १ राफेल विमान आता १,६७० कोटी रुपयांमध्ये का आहे?, १२६ राफेल विमानांऐवजी केवळ ३६ राफेल का?, 'मेक इन इंडिया'ऐवजी 'मेक इन फ्रान्स' का?, ५ वर्षांचा उशीर का?.

भारतीय वायुसेनेच्या ऐतिहासिक क्षणांचे साक्षीदार होत आज बुधवारी ५ राफेल लढाऊ विमानांची पहिली तुकडी भारतात पोहोचली. फ्रान्सकडून खरेदी केलेले हे राफेल लढाऊ विमाने दुपारी ३ वाजून १० मिनिटांनी हरयाणातील अंबाला हवाईतळावर दाखल झाली.

वाचा: मोदींनी राफेलचे केले संस्कृतमध्ये स्वागत, गृहमंत्री म्हणाले 'गेम चेंजर'

शक्तिशाली लढाऊ राफेल विमानांची अनेक वर्षांपासून प्रतीक्षा होती. आज दुपारी पाच लढाऊ विमानांनी गर्जना करत अंबालाच्या हवाईतळावर उतरले. त्यानंतर देशाचे संरक्षणमंत्री राजनाथ सिंह यांनी ५ राफेल विमानांचे अंबाला येथे सुरक्षितपणे लँडिग झाल्याची माहिती दिली. राफेल लढाऊ विमानांचे भारतातील आगमन ही आमच्या लष्करी इतिहासाच्या नव्या युगाची सुरुवात आहे, असे ट्विट करत संरक्षण मंत्री राजनाथ सिंह यांनी म्हटले.

वाचा: भारतीय भूमीवर झाले राफेलचे 'हॅप्पी लँडिग', संरक्षण मंत्रालयाने ट्विट केला व्हिडिओ
या विमानांमुळे आपल्या हवाई दलाची ताकद निश्चितच वाढेल, असे सांगताना त्यांनी विरोधकांनाही अप्रत्यक्षपणे टोला हाणला. ज्यांना आपली प्रादेशिक अखंडता धोक्यात आणायची आहे अशांना भारतीय हवाई दलाच्या सामर्थ्याबद्दल चिंता करावी लागेल असे राजनाथ म्हणाले.

हे फोटोफीचर नक्की पाहा: भारतीय राफेल की चीनी J-२०?; कोण आहे दमदार?