‘राजन हे तर काँग्रेसचे दलाल’

नवी दिल्ली : केंद्रात भारतीय जनता पक्षाचे सरकार आल्यापासून रिझर्व्ह बँकेचे गव्हर्नर रघुराम राजन हे काँग्रेस पक्षाचे दलाल असल्याप्रमाणे काम करत होते, असा आरोप भाजपचे राज्यसभेचे खासदार सुब्रमण्यम स्वामी यांनी केला आहे.

राजन यांनी लघु व मध्यम उद्योग बंद होतील, अशी धोरणे आखली. भारतीय अर्थव्यवस्थेमध्ये घातपात घडवण्याचा त्यांचा प्रयत्न होता. मी नेहमी त्यांच्याविषयी जे मत मांडले होते, ते खरे असल्याचे यातून सिद्ध होते, असे स्वामी यांनी सांगितले. राजन यांना गर्व्हनरपदाची दुसरी टर्म मिळू नये, यासाठी स्वामी यांनी आघाडी उघडली होती. यापूर्वीही अनेकवेळा त्यांनी राजन यांच्यावर आरोप केले होते. नुकतीच राजन यांना पुन्हा गर्व्हनरपद मिळू नये, यासाठी स्वामी यांनी पंतप्रधान नरेंद्र मोदी यांना दोन पत्रे लिहिली होती. शनिवारी राजन यांनी आपणहून गर्व्हनरपदाची दुसरी टर्म स्वीकारणार नसल्याचे स्पष्ट केल्याने स्वामी यांची इच्छा पूर्ण झाली आहे.