राहुल गांधी पुढील महिन्यात काँग्रेस अध्यक्ष?

मटा ऑनलाइन वृत्त । नवी दिल्ली

राहुल गांधी पुढील महिन्यात काँग्रेस अध्यक्षपदी विराजमान होऊ शकतात, असे स्पष्ट संकेत आज पक्षाचे ज्येष्ठ नेते एम. वीरप्पा मोइली यांनी दिले. राहुल गांधी यांना पक्षांतर्गत निवडणूक प्रक्रियेच्या माध्यमातून पक्षाच्या अध्यक्षपदी विराजमान व्हायला आवडेल, असेही मोइली म्हणाले.

राहुल यांनी पक्षाध्यक्षपदाची जबाबदारी सांभाळल्यास काँग्रेससाठी हा बदल 'गेम चेंजर' ठरेल तसेच ते पक्षाच्या आणि देशाच्याही भल्याचे ठरेल, असा विश्वास मोइली यांनी व्यक्त केला.

राहुल यांनी अध्यक्ष व्हावं, असं पक्षातील सर्वांनाच वाटत आहे. खरं तर यासाठी उशीरच झाला आहे. आता राहुल यांना संघटनात्मक निवडणुकीची प्रतीक्षा आहे. रितसर निवडणूक प्रक्रियेच्या माध्यमातूनच आपण अखिल भारतीय काँग्रेस समितीचा अध्यक्ष म्हणून निवडून यावं, असं त्यांचं स्पष्ट मत असल्याचे मोइली यांनी सांगितले.

सध्या राज्यस्तरावर संघटनात्मक निवडणूक प्रक्रिया सुरू आहे. या महिन्यात या निवडणुका पूर्ण होणार आहेत. त्यानंतर पुढच्या महिन्यात अखिल भारतीय काँग्रेस समितीची निवडणूक होईल, असे मोइली म्हणाले. राहुल गांधी पुढच्या महिन्यात काँग्रेसचे अध्यक्ष होतील का?, असा थेट प्रश्न विचारला असता, 'अशी शक्यता आहे', असं सूचक उत्तर मोइली यांनी दिलं.