काँग्रेसमुक्त भारतासाठी राहुल अध्यक्ष व्हावेत

मटा ऑनलाइन वृत्त । लखनऊ

राहुल गांधी यांना काँग्रेसचे राष्ट्रीय अध्यक्ष करण्यासाठी काँग्रेसमध्ये जोर बैठका सुरू असतानाच उत्तर प्रदेशचे मुख्यमंत्री योगी आदित्यनाथ यांनी मात्र त्यावर मार्मिक टीका केली आहे. 'राहुल काँग्रेसचे राष्ट्रीय अध्यक्ष होत असतील तर त्यांना आमच्या शुभेच्छाच आहेत,' असं सांगतानाच 'काँग्रेसमुक्त भारतासाठी राहुल यांना काँग्रेसचं अध्यक्ष करायलाच हवं,' असा चिमटाही आदित्यनाथ यांनी काढला.

एका वृत्तवाहिनीशी बोलताना आदित्यनाथ यांनी हे वक्तव्य केलं. यावेळी आदित्यनाथ यांनी राहुल गांधी यांच्या गुजरातमधील मंदिर भेटींवर टीकाही केली. 'आज राहुल मंदिरांमध्ये जात आहेत. त्यानिमित्ताने त्यांची बुद्धी शुद्ध होत असल्याने मी खूश आहे. याच काँग्रेसने राम आणि कृष्ण काल्पनिक असल्याचं शपथपत्र सर्वोच्च न्यायालयात सादर केलं होतं. मग राहुल मंदिरात काय करत आहेत? हे त्यांना विचारायला हवं,' असं आदित्यनाथ म्हणाले.

'राहुल यांना मंदिरात बसताही येत नाही. एका मंदिरात नमाज पठण करायला बसतात तसे ते बसले होते,' अशी टीकाही त्यांनी केली. 'मी गुजरातचा दौरा करून आलोय. गुजरातमधील लोकांमध्ये उत्साह आहे. त्यामुळे भाजपला गुजरातमध्ये स्पष्ट बहुमत मिळेल यात शंकाच नाही,' असा विश्वासही त्यांनी व्यक्त केला.