वृत्तसंस्था, नवी दिल्ली
काँग्रेसच्या अध्यक्षपदावरून पक्षातच अनिश्चितता असताना माजी केंद्रीय मंत्री व काँग्रेस नेते अजय माकन यांनी राहुल गांधी यांची पाठराखण केली आहे. राहुल गांधी हे पक्षातील सर्वाधिक स्वीकारार्ह नेता असल्याने त्यांनी पक्षाध्यक्षपदाची धुरा पुन्हा एकदा स्वीकारण्याची हीच योग्य वेळ आहे, असे मत माकन यांनी व्यक्त केले. वृत्तसंस्थेला दिलेल्या मुलाखतीत त्यांनी काँग्रेसच्या सद्यस्थितीबाबतही मतप्रदर्शन केले. यापूर्वीही काँग्रेसच्या वरिष्ठ नेत्यांनी अध्यक्षपदासाठी राहुल गांधींनाच साकडे घातले आहे.
'काँग्रेसमधील वरिष्ठ नेत्यांनी तरुण नेत्यांना टप्प्याटप्प्याने जागा करून देण्याची गरज आहे. पक्षाने नेतृत्वात बदल केला नाही, तर लोक पक्षच बदलतात,' अशी टिप्पणी त्यांनी केली. 'राहुल गांधी हे पक्षातील सर्वाधिक पसंतीचे नेते आहेत. त्यांचा हेतू चांगला आहे; तसेच भाजप व पंतप्रधान नरेंद्र मोदी अशा बलाढ्य विरोधकांविरोधात सातत्याने आक्रमक भूमिका घेणे हे राहुल यांचे वैशिष्ट्य आहे. त्यामुळे राहुल यांनी पुन्हा एकदा पक्षाचे नेतृत्व स्वीकारावे,' असे ते म्हणाले. काँग्रेसच्या हंगामी अध्यक्षा सोनिया गांधी यांनी यापुढे दीर्घ काळ सल्लागाराच्या भूमिकेतून नव्या पक्षाध्यक्षास मार्गदर्शन करावे. त्यांचा अनुभव व ज्ञान नव्या अध्यक्षासाठी अतिशय हितावह ठरेल. यासाठी पक्षाच्या घटनेतही बदल करता येईल, असे त्यांनी नमूद केले.
'मोदींचा हेतू बघा...'
'आकर्षक भाषणे करणाऱ्या नेत्याला पाठिंबा दिल्यानंतर देशाला काय भोगावे लागते, हे आपण पाहत आहोत,' असे सांगून माकन यांनी पंतप्रधान मोदी यांच्यावर टीका केली. 'देशाची अर्थव्यवस्था डबघाईला आली आहे, सामाजिक सुरक्षा धोक्यात आली आहे, राजधानीतही जातीय दंगे होत आहेत. मतदार मोदींच्या भाषणावर भूलले. मात्र, मोदींचा हेतू काय आहे, हे कोणीच ओळखले नाही, अशी टीका त्यांनी केली.'