जेष्ठ नागरिकांच्या पदरी निराशाच; रेल्वे तिकिटांवर सूट नाहीच, वाचा काय म्हणाले केंद्रीय रेल्वेमंत्री...

वृत्तसंस्था, नवी दिल्लीः ‘वाढता खर्च लक्षात घेता रेल्वेतील ज्येष्ठ नागरिकांना देण्यात येणाऱ्या सवलती सध्या तरी पूर्ववत करता येणार नाहीत’, अशी स्पष्टोक्ती रेल्वेमंत्री अश्विनी वैष्णव यांनी बुधवारी लोकसभेत केली. रेल्वेतील प्रवासीसेवांसाठी गेल्या वर्षी ५९ हजार कोटी रुपयांचे अनुदान देण्यात आले आहे. याशिवाय वेतन आणि निवृत्ती वेतनावरही मोठा खर्च होत असल्याचेही वैष्णव यांनी म्हटले आहे. महाराष्ट्रातील अपक्ष खासदार नवनीत राणा यांनी ज्येष्ठ नागरिकांच्या सवलती पुन्हा कधी पूर्ववत होणार, असा प्रश्न विचारला. त्यावर उत्तर देताना रेल्वेमंत्र्यांनी हे स्पष्टीकरण दिले. करोनाकाळामध्ये रेल्वेतील ज्येष्ठ नागरिकांना देण्यात आलेली सवलत स्थगित करण्यात आली होती.

‘प्रवाशांच्या सेवांसाठी ५९ हजार कोटी रुपयांचे अनुदान गेल्या वर्षी देण्यात आले. ही रक्कम एखाद्या राज्याच्या अर्थसंकल्पापेक्षा मोठी आहे. रेल्वेतर्फे वार्षिक निवृत्ती वेतनासाठी ६० हजार कोटी रुपये, तर वेतनासाठी ९७ हजार कोटी रुपये रक्कम खर्च होते. याशिवाय इंधनावर ४० हजार कोटी रुपये खर्च केले जातात. रेल्वेचा हा खर्च दिवसेंदिवस वाढतच आहे. रेल्वेचे जाळे विस्तारत असून, येत्या वर्षांत रेल्वेसाठीचा खर्च वाढतच जाणार आहे’, असे त्यांनी सांगितले.

‘केवळ आसनव्यवस्था असलेल्या वंदे भारत रेल्वेगाड्या सध्या ५०० ते ५५० किलोमीटरचे अंतर पार करीत आहेत. मात्र, झोपण्याची व्यवस्था असलेल्या वंदे भारत सुरू झाल्यास त्या आणखी जास्त अंतर कापतील. याशिवाय अयोध्येचे राममंदिर पूर्ण होईपर्यंत देशाच्या प्रत्येक भागातून अयोध्येला पोहोचण्यासाठी गाड्या सुरू करण्याचा सरकारचा विचार आहे’, अशी माहितीही त्यांनी दिली.

६० हजार कोटी रुपये

निवृत्तिवेतनापोटी रेल्वेचा वार्षिक खर्च

९७ हजार कोटी रुपये

वेतनापोटी रेल्वेचा खर्च

४० हजार कोटी रुपये

इंधनापोटी वार्षिक खर्च