BJP: मुस्लिमांना घरात घुसू देऊ नका

अलवर: 'मुस्लिम लोक गुन्हेगार असतात. म्हणून कोणत्याही मुस्लिम व्यक्तीला मी माझ्या घरीच काय कार्यालयातही येऊ देत नाही. त्यांच्याकडे मते मागायलाही जात नाही, त्यामुळे त्यांना तुम्हीही घरात घुसू देऊ नका,' असं अजब आवाहन भाजपचे राजस्थानमधील आमदार बनवारीलाल सिंघल यांनी हिंदू समुदायाला केलं आहे. सिंघल यांच्या या आवाहनावर आश्चर्य व्यक्त केलं जात आहे.

बनवारी लाल सिंघल हे भाजपचे राजस्थानच्या अलवर मतदार संघातील आमदार आहेत. एका बैठकीला संबोधित करताना त्यांनी हे आवाहन केलं. त्यानंतर 'टाइम्स ऑफ इंडिया'ने त्यांची पुन्हा प्रतिक्रिया जाणून घेतली असता त्यांनी त्याचा पुनरुच्चार केला. 'मेव मुस्लिम कधीच भाजपला मतदान करत नाहीत. मीही त्यांना मतं मागायला जात नाही. त्यांना मतं मागण्याचा अर्थ त्यांच्या गुन्ह्यांकडे डोळेझाक करणं असा आहे. त्यामुळे मी त्यांच्यापासून चार हात लांबच राहतो,' अशी मुक्ताफळे सिंघल यांनी उधळली आहेत. मुस्लिम लोक गोहत्या, लव्ह जिहाद आणि फसवणूक आदी गुन्ह्यात सहभागी असतात, असा दावाही त्यांनी केला. दरम्यान, याच अलवरमध्ये नुकत्याच झालेल्या लोकसभा मतदार संघाच्या पोटनिवडणुकीत भाजपला पराभवाचा सामना करावा लागला होता.