राजनाथ सिंहांना सलामी देण्यास पोलिसांचा नकार

मटा ऑनलाइन वृत्त । जयपूर/जोधपूर

केंद्रीय गृहमंत्री राजनाथ सिंह सोमवारी जोधपूर दौऱ्यावर असताना राजस्थानमधील २५० पोलीस कर्मचारी पगारात होणाऱ्या कपातीच्या विरोधात एक दिवसाच्या सुट्टीवर गेले. इतकच नव्हे तर, जे पोलीस ड्यूटीवर होते त्यांनी राजनाथ सिंह यांना सलामी देण्यास नकार दिला.

जोधपूर पोलीस आयुक्त अशोक राठौड यांनी 'टाइम्स ऑफ इंडिया'शी बोलताना ही माहिती दिली. ते म्हणाले, जवळपास २५० पोलिसांहून अधिक पोलीस कर्मचारी एकाचवेळी एक दिवसाच्या सुट्टीवर गेले. या पोलिसांची सुट्टी मंजूर केली नाही. तरी सुद्धा ते रजेवर गेले. राजनाथ सिंह यांना 'गार्ड ऑफ ऑनर' देण्यासाठी पोलिसांची ड्यूटी लावली होती परंतु त्यांनीही सलामी देण्यास नकार दिला. मजबुरीने आम्हाला दुसऱ्या कर्मचाऱ्यांना बोलावून केंद्रीय गृहमंत्र्यांना सलामी द्यावी लागली, असं राठौड म्हणाले.

हा सर्व प्रकार गंभीर असून दोषी पोलीस कर्मचाऱ्यांवर कडक कारवाई करणार असल्याचे राठौड म्हणाले. पोलीस कर्मचाऱ्याचा सध्याचा पगार २४ हजार रुपये आहे. व ते कमी करून राज्य सरकार १९ हजार रुपये करणार असल्याची अफवा पसरल्याने हे पोलीस कर्मचारी सुट्टीवर गेले आहेत, नियमांचे उल्लंघन करणे चुकीचे आहे, असे राजस्थानचे डीजीपी अजित सिंह यांनी सांगितले.