'थलाईवा' रजनीकांत पुन्हा एकदा रुग्णालयात दाखल

हैदराबाद : दाक्षिणात्य अभिनेते आणि सुपरस्टार सजनीकांत यांना उच्च रक्तदाबाचा त्रास जाणवल्यानंतर पुन्हा एकदा रुग्णालयात दाखल करण्यात आलंय. रजनीकांत यांच्यावर हैदराबादच्या अपोलो रुग्णालयात उपचार सुरु आहेत. रुग्णालयाकडून अधिकृतरित्या ही माहिती देण्यात आलीय. उल्लेखनीय म्हणजे, ३१ डिसेंबर रोजी रजनीकांत यांनी आपल्या नव्या राजकीय पक्षाची घोषणा केली होती. रजनीकांत बरे व्हावेत म्हणून चाहत्यांनी प्रार्थना करण्यास सुरुवात केली आहे. उच्च रक्तादाबाशिवाय रजनीकांत यांना इतर त्रास नसल्याची माहिती अपोलो रुग्णालयाकडून देण्यात आली आहे. (Superstar Rajinikanth admitted to Apollo hospital in Hyderabad after bp fluctuations )

रजनीकांत यांच्या 'अन्नाथे' या आगामी चित्रपटाचं शूटिंग हैदराबादमध्ये सुरू होतं. टीममधील चार सदस्यांना कोरोना विषाणूची बाधा झाल्याचं समजल्यानंतर चित्रपटाचं शूटिंग थांबवण्यात आलं होतं. त्यानंतर रजनीकांत यांनी चेन्नईतील आपल्या फार्महाऊसमध्ये आयसोलेट होण्याचा निर्णय घेतला होता. मंगळवारी त्यांच्या करोना चाचणीचा रिपोर्टही आला होता.

शेतकऱ्यांना अधिकारच, कृषी कायद्यात चुकीचं काय?, पंतप्रधानांचा प्रश्न 'काळे कायदे मागे घ्या', 'आप' खासदारांची पंतप्रधानांसमोर घोषणाबाजी
अपोलो रुग्णालयाकडून देण्यात आलेल्या माहितीनुसार, रजनीकांत यांची करोना चाचणीदेखील करण्यात आलीय. या चाचणीत रजनीकांत करोना निगेटिव्ह आढळले आहेत. परंतु, त्यांच्या रक्तदाबात मात्र चढ-उतार दिसून आल्यानं त्यांना रुग्णालयात हलवण्यात आलं. डॉक्टरांची एक विशेष टीम त्यांच्या प्रकृतीवर लक्ष ठेवून आहे. रक्तदाब सामान्य झाल्यानंतर त्यांना रुग्णालयातून डिस्चार्ज दिला जाईल.

यापूर्वी, रजनीकांत यांच्यावर मूत्रपिंड प्रत्यारोपणाची (Kidney Transplant) शस्रक्रिया पार पडली होती. ऑक्टोबर महिन्यात रुग्णालयात दाखल करण्यात आलं होतं. रजनीकांत यांच्या शरीरात रोगप्रतिकारक शक्ती कमी झाल्याचं डॉक्टरांना आढळळं होतं. त्यामुळे डॉक्टरांकडून त्यांना करोना काळात बाहेर न पडण्याचा सल्ला देण्यात आला होता.