राजीव कुमार यांची शिलाँगमध्ये चौकशी

वृत्तसंस्था, शिलाँग

पश्चिम बंगालमधील चिटफंड घोटाळाप्रकरणी कोलकात्याचे पोलिस आयुक्त राजीव कुमार यांची केंद्रीय अन्वेषण विभागाने (सीबीआय) शनिवारी शिलाँग येथे चौकशी सुरू केली.

कुमार यांच्या चौकशीवरून गेल्या रविवारी सीबीआय़ व पश्चिम बंगालमधील ममता सरकार यांच्यात अभूतपूर्व संघर्ष उद्भवला होता. त्यानंतर हे प्रकरण सर्वोच्च न्यायालयात गेले. सर्वोच्च न्यायालयाने, कुमार यांची चौकशी शिलाँगमध्ये होईल, असे आदेश दिले होते. त्यानुसार ही चौकशी शनिवारी सुरू झाली. कुमार हे शनिवारी चौकशीसाठी दाखल झाले तेव्हा यांच्यासोबत त्यांचे वकील विश्वजीत देव, तसेच दोन वरिष्ठ आयपीएस अधिकारी होते. मात्र ११ वाजता चौकशी सुरू झाल्यानंतर अर्ध्या तासातच या तिघांना तेथून जाण्यास सांगण्यात आले.