राम मंदिर होणार, थोडा संयम राखा: योगी

अयोध्या :

प्रभू रामचंद्रांची कृपादृष्टी झाल्यास लवकरच अयोध्येत राम मंदिर उभे राहील. त्यासाठी काही दिवस आपण सगळ्यांनीच संयम बाळगण्याची गरज आहे, असे आवाहन उत्तर प्रदेशचे मुख्यमंत्री योगी आदित्यनाथ यांनी आज संत-महंताच्या संमेलनात केले.

महंत नृत्यगोपाल दास यांच्या वाढदिवसानिमित्त हे संमेलन आयोजित करण्यात आले होते. या संमेलनाला प्रमुख पाहुणे म्हणून उपस्थित असलेल्या योगींनी राम मंदिराचा तीढा नक्कीच सुटेल, फक्त त्यासाठी सर्वांनी थोडासा संयम दाखवण्याची गरज आहे, असे आवाहन केले. हा प्रश्न घटनेच्या चौकटीत राहूनच सोडवावा लागणार आहे, असेही योगींनी नमूद केले. जे लोक रामजन्मभूमी आंदोलनाला विरोध करत होते, ते आता मंदिराबाबत बोलू लागले आहेत. हे कारस्थानही असू शकते. त्यामुळे त्यापासून आपल्याला सावध राहावे लागेल, असेही योगी म्हणाले. ज्यांनी रामभक्तांवर गोळ्या झाडल्या तेच लोक आज राम मंदिराबाबत बोलू लागल्याचे सांगत योगींनी विरोधी पक्षांवरही निशाणा साधला.

गेल्या १५ वर्षांत किती मुख्यमंत्री अयोध्येत आले, असा सवाल करत भाजपचे सरकार अयोध्या आणि रामजन्मभूमीच्या विकासात कोणतीही कुचराई करणार नाही, असे आश्वासन योगींनी दिले. आधीच्या सरकारने बंद केलेला अयोध्येतील रामलीला सोहळा आम्ही पुन्हा सुरू केल्याची बाबही त्यांनी अधोरेखित केली.