बेंगळुरू : 'राम देव नव्हते. सामान्य माणसांसारख्याच त्यांच्यातही अनेक उणिवा होत्या,' असा उल्लेख पुस्तकाद्वारे करणारे लेखक के. एस. भगवान यांच्याविरोधात उजव्या विचारसरणीच्या संघटनांनी शुक्रवारी जोरदार निदर्शने केली. भगवान यांनी 'राम मंदिर येके बेडा' (राम मंदिराची गरज का नाही?) असे पुस्तक कन्नड भाषेतून लिहिले आहे. त्यामध्ये प्रभू राम यांच्याबद्दल अनेक वादग्रस्त विधाने करण्यात आली असून, हा राम यांचा अपमान आहे, असा दावा करीत संघटनांनी भगवान यांच्या घरासमोर निदर्शने केली. भगवान यांना अटक करण्यात यावी अशी मागणीदेखील या वेळी करण्यात आली. दरम्यान, आपले पुस्तक वाल्मिकी रामायणावर आधारित असल्याचा दावा भगवान यांनी केला आहे. कर्नाटक भाजपनेदेखील भगवान यांना अटक करण्याची मागणी केली असून, मुख्यमंत्री कुमारस्वामी यांच्यावर टीका केली आहे. कुमारस्वामी यांनी या मुद्द्यावर मौन का बाळगले आहे, असा सवालही भाजपने केला आहे.
राम देव नव्हते म्हणणाऱ्या लेखकाचा निषेध
'राम देव नव्हते. सामान्य माणसांसारख्याच त्यांच्यातही अनेक उणिवा होत्या,' असा उल्लेख पुस्तकाद्वारे करणारे लेखक के. एस. भगवान यांच्याविरोधात उजव्या विचारसरणीच्या संघटनांनी शुक्रवारी जोरदार निदर्शने केली.
महाराष्ट्र टाइम्स 29 Dec 2018, 4:00 am