रा. मो. हेजीब यांचे निधन

नवी दिल्ली : महाराष्ट्र परिचय केंद्राचे माजी संचालक व दिल्ली सार्वजनिक उत्सव समितीचे अध्यक्ष रामकृष्ण मोरेश्वर हेजीब (७४) यांचे शनिवारी येथील फोर्टीस रुग्णालयात हृदयविकाराने निधन झाले. उद्या, सोमवारी त्यांच्यावर अंत्यसंस्कार करण्यात येणार आहेत. हेजीब यांच्या मागे पत्नी नीना आणि मुलगी तनुजा असा परिवार आहे.

हेजीब यांनी महाराष्ट्र परिचय केंद्राचे संचालक म्हणून १ सप्टेंबर १९९४ ते ३१ ऑक्टोबर २००० या कालावधी दरम्यान कार्यभार सांभाळला. मराठी नाटय महोत्सव, चित्रपट महोत्सव आदी आयोजनांतून त्यांनी महाराष्ट्र शासनाच्यावतीने दिल्लीत मराठी संस्कृती जतन व संवर्धनात मोलाचे योगदान दिले. निवृत्तीनंतर त्यांनी सार्वजनिक उत्सव समितीच्या माध्यमातूनही महाराष्ट्र दिन महोत्सव, गणेशोत्सव, लोकमान्य टिळक पुण्यतिथी, महाराष्ट्राचे दिवंगत मुख्यमंत्री यशवंतराव चव्हाण जयंती, दिवंगत केंद्रीय मंत्री वसंत साठे जयंती, कोजागिरी पौर्णिमा आदी कार्यक्रमांच्या आयोजनात सदैव पुढाकार घेतला. हेजीब यांचा जन्म पुणे येथे झाला. ते १९४८-४९ साली दिल्लीत आले.

जावडेकर यांची श्रद्धांजली

हेजीब हे दुर्मीळ व्यक्तीमत्वाचे धनी होते. दिल्लीत मराठी संस्कृतीच्या जतन व संवर्धनाच्या दृष्टीने नव-नवीन कल्पना व कार्यक्रमांसाठी ते सदैव तत्पर व आग्रही असत. त्यांच्या अनन्यसाधारण योगदानामुळे दिल्लीतील मराठी माणूस त्यांना नेहमीच आठवणीत ठेवतील, अशा शब्दांत केंद्रीय मनुष्यबळ विकास मंत्री प्रकाश जावडेकर यांनी हेजीब यांना श्रद्धांजली वाहिली.