लालूप्रसाद यादव यांना उद्या ठोठावणार शिक्षा

रांची (झारखंड ): देवघर कोषागारातून अवैध मार्गाने पैसे काढल्याप्रकरणी (चारा घोटाळा) बिहारचे माजी मुख्यमंत्री आणि आरजेडीप्रमुख लालूप्रसाद यादव, आर. के. राणा, जगदीश शर्मा आणि तीन माजी आयएएस अधिकाऱ्यांसह १६ दोषींना उद्या (शनिवार) २ वाजता शिक्षा ठोठावण्यात येणार आहे.

सीबीआय कोर्टात या प्रकरणावरील शिक्षेबाबतचा वाद-प्रतिवाद आज पूर्ण झाला. लालूप्रसाद यांचे वकील कोर्टात हजर होते. लालूप्रसाद यांच्यासह सर्वच दोषींना उद्या व्हिडिओ कॉन्फरन्सिंगद्वारे शिक्षा ठोठाण्यात येणार आहे.

यापूर्वी, आपले प्रकृती स्वास्थ्य ठीक नसल्याने शिक्षा कमीत कमी देण्यात यावी अशी विनंती लालूप्रसाद यांनी कोर्टाकडे केली होती. लालूप्रसाद यांना मधुमेह आणि श्वासाशी संबंधित तक्रारी आहेत आणि अशा परिस्थितीत त्यांना तुरुंगात ठेवणे योग्य होणार नसल्याचे वकिलाने कोर्टाला सांगितले. या प्रकरणात लालूप्रसाद यांना शिक्षा ठोठावण्यात आली आहे, मात्र जगन्नाथ मिश्रसारख्या लोकांना सोडून देण्यात आले आहे. लालूंनी एका वर्षाची शिक्षा देखील भोगली आहे असेही लालूप्रसादांच्या वकिलांनी आपल्या युक्तिवादात म्हटले आहे.

चारा घोटाळा प्रकरणात दोषी असलेल्यांमध्ये लालूप्रसाद यादव यांच्यासह आर. के. राणा, जगदीश शर्मा, तीन आयएएस अधिकारी, तत्कालीन वित्त आयुक्त फूलचंद सिंह, पशुपालन विभागाचे तत्कालीन सचिव बेकस जूलियस आणि आणखी एक वरिष्ठ अधिकारी महेश प्रसाद यांचा समावेश आहे.

एका राजकीय षडयंत्राच्या आधारे आपल्याला या प्रकरणात गोवण्यात आले असे लालूप्रसाद यांनी तुरुंगात जाण्यापूर्वी म्हटले होते. या निर्णयाविरुद्ध आपण हायकोर्टात जाणार असल्याचेही त्यांनी जाहीर केले आहे. आता, लालूप्रसाद यादव यांच्यासह इतरांना कोर्ट काय शिक्षा ठोठावते याकडे सर्वांचेच लक्ष लागले आहे.