जिओ ग्राहकांच्या डेटा चोरीची माहिती खोटी

मटा ऑनलाइन वृत्त | नवी दिल्ली

रिलायन्स जिओ ग्राहकांचा डेटा हॅक झाल्याच्या बातमीने एकच खळबळ उडाली असली तरी ग्राहकांनी घाबरून जाण्याचं काहीच कारण नाही. कारण अशाप्रकारे डेटा हॅक होणं शक्यच नसल्याचं स्पष्टीकरण रिलायन्सकडून देण्यात आलं आहे.

रिलायन्स जिओ ग्राहकांचा डेटा हॅक झाल्याचं वृत्त कंपनीने पूर्णपणे फेटाळून लावलं आहे. उलट ज्या वेबसाईटने ग्राहकांचा डेटा हॅक केल्याचा दावा केला होता ती वेबसाईटच बंद करून टाकण्यात आली आहे, असंही कंपनीने स्पष्ट केलं आहे.

मॅजिकएपीके डॉट कॉमने रविवारी आपण रिलायन्स जिओ ग्राहकांचा डेटा हॅक केल्याचा दावा केला होता. बातमी वाऱ्यासारखी पसरली आणि ग्राहकांमध्ये एकच घबराट निर्माण झाली. जिओच्या प्रवक्त्यांनी पत्रकार परिषद घेऊन संपूर्ण प्रकरणाचा खुलासा केला.

'डेटा हॅक केल्याचा वेबसाईटने केलेला दाव पूर्णपणे निराधार असून आम्ही त्याची चौकशी केली. प्राथमिकदृष्ट्या माहिती घेतली असता वेबसाईटने जारी केलेला डेटा खोटा असल्याचे निष्पन्न झालं आहे. त्यामुळे ग्राहकांनी निर्धास्त राहावं. जिओच्या कोणत्याही ग्राहकाचा डेटा चोरीला गेलेला नाही.', असं जिओच्या प्रवक्त्यांनी आश्वस्त केलं आहे.

संबंधित वेबसाईट बंद करण्यात आली आहे. वेबसाईटचं नोंदणीकरण भारतात झालेलं असलं तरी डोमेन नोंदणीकरण सेवेबाबत कोणतीही माहिती उपलब्ध नाही. वेबसाईटच्या खोट्या दाव्याबाबत पोलिसांत तक्रार देखील करण्यात आल्याची माहिती प्रवक्त्यांनी दिली.

मॅजिकएपीके वेबसाईटने जिओच्या १ कोटी २० लाख ग्राहकांचा डेटा हॅक केल्याचा दावा केला होता. यात जिओ वापरकर्त्यांचे नाव, मोबाईल नंबर, ईमेल आयडी, सिम खरेदी केल्याची तारीख आणि आधार क्रमांक अशी माहिती मिळवल्याचं नमूद करण्यात आलं होतं.