जेएनयूला मोदींचे नाव द्या: भाजप खासदार

दिल्ली: 'जवाहरलाल नेहरू विद्यापीठा'चे नाव बदलून 'मोदी नरेंद्र विद्यापीठ' करावे अशी मागणी भाजपचे खासदार हंस राज हंस यांनी केली आहे. जवाहरलाल नेहरू विद्यापीठात अखिल भारतीय विद्यार्थी परिषदेने आयोजित केलेल्या एका कार्यक्रमात ते बोलत होते.

'एक शाम शहीदो के नाम' नावाचा कार्यक्रम जवाहरलाल नेहरू विद्यापीठात शनिवारी संध्याकाळी आयोजित करण्यात आला होता. या कार्यक्रमात खासदार हंसराज हंस आणि भाजप नेते मनोज तिवारी उपस्थित होते. काश्मीरच्या तिढ्यासाठी जवाहरलाल नेहरूच जबाबदार आहेत असा आरोप हंस राज हंस यांनी यावेळी केला. ' जवाहरलाल नेहरूंमुळे काश्मीर प्रश्न चिघळला होता. आज नरेंद्र मोदींनी हा प्रश्न सोडवला आहे. मोदींच्या नावावरही या देशात काहीतरी असायला हवं. जवाहरलाल नेहरू विद्यापीठाचे नाव बदलून मोदी नरेंद्र विद्यापीठ ठेवायला हवं'.

तसंच मोदींनी देशासाठी भरपूर योगदान दिलं असल्याचंही त्यांनी सांगितलं. यावेळी कलम ३७०बद्दल बोलताना काश्मीरमध्ये शांतता नांदेल अशी आशाही त्यांनी व्यक्त केली. ' काश्मीरमध्ये बॉम्बस्फोट नको व्हायला. एकही भारतमातेचा पुत्र मरू नये'. हंस राज हंस उत्तर पश्चिम दिल्ली मतदारसंघाचे खासदार आहेत.