'वायू' वादळ: बचाव यंत्रणा सज्ज

वृत्तसंस्था, अहमदाबाद

महाराष्ट्र टाइम्स.कॉम

वायू चक्रीवादळ वेगाने गुजरात किनारपट्टीकडे सरकत असल्याने केंद्र, राज्य तसेच विविध यंत्रणांच्या बचाव यंत्रणांना सज्ज ठेवण्यात आले आहे.

वायू वादळ आज, गुरुवारी सकाळी वेरावळ किनारी धडकणार असल्याने किनाऱ्यांलगत राहणाऱ्या नागरिकांना सुरक्षितस्थळी हलविण्यात आले आहे. खबरदारीचा उपाय म्हणून सर्व बंदरे आणि विमानतळ बंद ठेवण्यात आले आहेत. राष्ट्रीय आपत्ती निवारण दलाची सुमारे ५२ पथके गुजरातमध्ये तैनात ठेवण्यात आली आहे. प्रत्येक पथकामध्ये ४५ जवान आहेत. त्याचप्रमाणे भारतीय लष्कराच्या १० तुकड्याही तैनात ठेवण्यात आल्या आहेत. बोटी, वृक्ष कापण्याची आयुधे, टेलिकॉम उपकरणेही त्यांच्याकडे आणीबाणीच्या काळासाठी देण्यात आली आहेत. पोरबंदर तसेच दीव भागातून वादळ मार्गक्रमण करणार असल्याने या भागांवर हवाई देखरेखही ठेवण्यात येणार आहे. युद्धनौका आणि हवाई दलाची विमानेही बचावकार्यासाठी तैनात करण्यात आल्याची माहिती प्रशासनाने दिली आहे. गुजरातमधून ३ लाख व दीवमधून १० हजार नागरिकांना सुरक्षित स्थळी हलवण्यात आले आहे. वैद्यकीय पथकांनाही शिबिरांमध्ये सज्ज ठेवण्यात आले आहे.

१० जिल्ह्यांमध्ये जोर

गुजरातमधील १० जिल्ह्यांमध्ये वादळाचा प्रभाव राहणार आहे. तेथे वादळाचा वेग १७० किमी प्रति तासापर्यंत राहील, असा अंदाज हवामान विभागाने वर्तवला आहे. पुढील २४ तास त्याचा प्रभाव राहील, असा इशाराही देण्यात आला आहे.

शाळा, कॉलेजे बंद

सर्व शाळा, कॉलेज, अंगणवाड्या बुधवारी बंद ठेवण्यात आल्या होत्या. आज, गुरुवारीही त्यांना सुट्टी जाहीर करण्यात आली आहे. वादळाच्या काळात वाऱ्याचा वेग तीव्र असणार असून, त्यामुळे घरांची छपरे उडण्याची, वीजपुरवठा खंडित होणे, रस्ते खचणे यांसह शेतांचे मोठे नुकसान होण्याची शक्यता आहे. दरम्यन, गृहमंत्री अमित शहा यांनीही गुजरातमधील वादळाला तोंड देण्यासाठी केलेल्या तयारीचा आढावा घेतला आणि नागरिकांच्या सुरक्षेसाठी अधिकाधिक उपाय करण्याचे आदेश प्रशासनाला दिले.