कोरेगाव भीमा प्रकरणात निकाल राखीव

वृत्तसंस्था, नवी दिल्ली

कोरेगाव भीमा प्रकरणात आरोपपत्र दाखल करण्यासाठी मुंबई उच्च न्यायालयाने ९० दिवसांपेक्षा अधिक मुदत देण्याची विनंती फेटाळल्याच्या पार्श्वभूमीवर या निर्णयाला आव्हान देणाऱ्या महाराष्ट्र सरकारच्या याचिकेवरील निकाल सर्वोच्च न्यायालयाने गुरुवारी राखून ठेवला.

'दोन्ही पक्षांच्या वकिलांचे युक्तिवाद ऐकून झाल्यानंतरच निकाल दिला जाईल,' असे सरन्यायाधीश रंजन गोगोई यांच्या नेतृत्वाखालील खंडपीठाने स्पष्ट केले. कोरेगाव भीमा प्रकरणात ९० दिवसांच्या आत चौकशी अहवाल सादर करण्याचे आदेश देण्यात आले होते. या मुदतीला आणखी ९० दिवसांची मुदतवाढ देण्याची मागणी मुंबई उच्च न्यायालयाने फेटाळली. या प्रकरणावर सुनावणी सुरू आहे. दरम्यान, सर्वोच्च न्यायालयाने मुंबई उच्च न्यायालयाच्या आदेशाला स्थगिती दिली. या प्रकरणात पोलिसांनी एका स्थानिक न्यायालयासमोर यापूर्वीच आरोपपत्र दाखल केले आहे. मात्र, सर्वोच्च न्यायालयाने उच्च न्यायालयाच्या आदेशाला स्थगिती दिली.