आरक्षणाबाबतच्या 'त्या' वक्तव्यावरून RSS बॅकफूटवर

मटा ऑनलाइन वृत्त। नवी दिल्ली

आरक्षण रद्द करण्याच्या भूमिकेवरुन जोरदार टीका सुरू झाल्यानंतर संघाने आरक्षणाच्या मुद्याबाबत सारवासारव सुरू केली आहे. अनुसूचित जाती-जमाती, ओबीसींना घटनेतील तरतुदीनुसार आरक्षण मिळायला हवे. मात्र, धर्माच्या आधारे असणाऱ्या आरक्षणाला संघाचा विरोध असल्याचे राष्ट्रीय स्वयंसेवक संघाचे प्रचार प्रमुख मनमोहन वैद्य यांनी प्रसिद्धीपत्रकाद्वारे स्पष्ट केले आहे.

मनमोहन वैद्य यांनी जयपूर लिटरेचर फेस्टिव्हलमध्ये बोलताना आरक्षण संपुष्टात आणण्याच्या मागणीवर पुन्हा एकदा जोर दिला होता. अधिक काळ आरक्षण सुरू राहिलं तर त्यातून बहिष्कृतपणाची भावना फोफावेल. समाजा-समाजातील दरी वाढेल. म्हणूनच कोणत्याही देशासाठी कायमस्वरूपी आरक्षणव्यवस्था असणं हे चांगलं लक्षण नसल्याचे वक्तव्य वैद्य यांनी केले होते. विरोधकांनी टीका सुरू केल्यानंतर संघाने प्रसिद्धीपत्रकाद्वारे आपली भूमिका स्पष्ट करण्याचा प्रयत्न केला आहे. हिंदू समाजामध्ये जातीच्या आधारे सामाजिक भेदभाव सुरू असेपर्यंत आरक्षण आवश्यक आहे. मात्र, धर्माच्या आधारे अल्पसंख्याक समुदायाला आरक्षण देणे चुकीचे असून दोन्ही गोष्टी वेगळ्या असल्याचे वैद्य यांनी स्पष्ट केले आहे.

दरम्यान, बिहार विधानसभा निवडणुकांच्या तोंडावर सरसंघचालक मोहन भागवत यांनी आरक्षणाविरोधात वक्तव्य केले होते. त्याचा फटका भाजपला निवडणुकीत बसला होता. त्यानंतर आता उत्तर प्रदेश, पंजाबसह पाच राज्यांमध्ये होणाऱ्या निवडणुकीच्या पार्श्वभूमीवर आरक्षण विरोधी वक्तव्यामुळे भाजपच्या चिंतेत वाढ झाली आहे.