'अमेरिकेपेक्षा मध्य प्रदेशातील रस्ते चकाचक'

मटा ऑनलाइन वृत्त | वॉशिंग्टन

मध्य प्रदेशातील रस्त्यांची स्थिती अमेरिकेतील रस्त्यांपेक्षा उत्तम आहे, असे वक्तव्य मुख्यमंत्री शिवराजसिंह चौहान यांनी वॉशिंग्टन डीसीतील एका कार्यक्रमात केले. पंतप्रधान नरेंद्र मोदी यांच्या नेतृत्वाखालील भाजप सरकारचेही त्यांनी कौतुक केले. मोदींच्या नेतृत्वाखालील भारताची आर्थिक प्रगती वेगाने होत आहे, असेही ते म्हणाले.

वॉशिंग्टन डीसीमध्ये रसेल सिनेट सभागृहात भारतीय दूतावासाच्या सहकार्याने पंडित दीनदयाळ उपाध्याय फोरमचे उद्घाटन झाले. या कार्यक्रमाला चौहान उपस्थित होते. यावेळी त्यांनी मोदी सरकारवर कौतुकाचा वर्षाव केला. पंतप्रधान मोदींच्या नेतृत्वाखाली भारताचा आर्थिक विकास अधिक तेजीने होत आहे, असे ते म्हणाले. पायाभूत सुविधांशिवाय कोणत्याही राज्याचा विकास होणे शक्य नाही. त्यामुळे आम्ही सुरुवातीला रस्ते तयार केले. येथील रस्ते अमेरिकेतील रस्त्यांपेक्षा उत्तम दर्जाचे आहेत. वॉशिंग्टनमध्ये विमानतळावर उतरलो आणि रस्तेमार्गाने आलो. त्यावेळी मध्य प्रदेशातील रस्ते अमेरिकेपेक्षा चांगले आहेत, असे ते म्हणाले. जगात श्रीमंत-गरीबामधील दरी वाढली असून त्याचा परिणाम शांततेवर होत आहे. भौतिकवादी प्रवृत्तींमुळे ही दरी वाढलेली आहे. ती कमी करण्यासाठी वैश्विक एकतेची गरज आहे, असेही ते म्हणाले.