भारतीय रेल्वेत १.३० लाख नोकऱ्या; संधी सोडू नका

नवी दिल्लीः

रेल्वे भरती मंडळाने (आरआरबी) १.३० लाख रिक्त पदांसाठी नोकरभरतीची जाहिरात काढली आहे. ही जाहिरात २३ फेब्रुवारी ते १ मार्च या कालावधीत एम्प्लॉयमेंट न्यूजपेपरमध्ये प्रकाशित होणार आहे. यासंदर्भातील अधिसूचना आरआरबीच्या संकेतस्थळावर लवकरच जारी केले जाणार आहे. या जाहिरातीनुसार, अ-तांत्रिक श्रेणीमध्ये (एनटीपीसी) ३० हजार रिक्त पदांसाठी अर्ज मागवण्यात येणार आहेत. तसंच पॅरामेडिकल, मिनिस्टिरियल अॅण्ड आयसोलेटेड आणि श्रमिक श्रेणी-१ साठी सुमारे १ लाख रिक्त पदे भरली जाणार आहेत.

अ-तांत्रिक श्रेणीमध्ये जूनियर क्लार्क कम टायपिस्ट, अकाउंट्स क्लार्क कम टायपिस्ट, ट्रेन्स क्लार्क, कमर्शियल कम तिकीट क्लार्क, ट्रॅफिक असिस्टंट, गुड्स गार्ड, सीनियर कमर्शियल कम तिकीट क्लर्क, सीनियर क्लार्क कम टायपिस्ट, जूनियर अकाउंट असिस्टंट कम टायपिस्ट, कमर्शियल अप्रैंटिस, स्टेशन मास्टर यांसारख्या पदांचा समावेश असणार आहे.

पॅरा मेडिकल श्रेणीत स्टाफ नर्स, हेल्थ अॅण्ड मलेरिया इंस्पेक्टर, फार्मासिस्ट, ईसीजी टेक्निशियन, लॅब असिस्टंट, लॅब सुप्रिटेंडंट या पदासांठी अर्ज मागवण्यात येणार आहेत.

मिनिस्टिरियल अॅण्ड आयसोलेटेड या श्रेणीमध्ये स्टेनोग्राफर, चीफ लॉ असिस्टंट, जूनियर ट्रांसलेटर (हिंदी) या पदांसाठी नोकरभरती करण्यात येणार आहे. तर श्रमिक श्रेणी-१ साठी ट्रॅक मेंनटेनर ग्रेड आयव्ही, टेक्निकल विभागामध्ये हेल्पर/असिस्टंट, असिस्टंट पॉइंट्समॅन आणि अन्य विभागांमधील रिक्त पदांसाठी नोकरभरतीचे अर्ज मागवण्यात येणार आहेत. इच्छुकांनी या जाहिरातीवर लक्ष ठेवल्यास नोकरीची उत्तम संधी रेल्वेच्या माध्यमातून उपलब्ध होणार आहे.