प्रशांत किशोर यांना शोधणाऱ्यास इनाम

मटा ऑनलाइन वृत्त । नवी दिल्ली

उत्तर प्रदेशातील दारुण पराभवाचं खापर फोडण्यासाठी 'डोकी' शोधणाऱ्या काँग्रेसनं निवडणूक व्यवस्थापनातले 'चाणक्य' म्हणून ओळखल्या जाणाऱ्या प्रशांत किशोर यांना लक्ष्य केलं आहे. प्रशांत किशोर यांना शोधून कार्यकर्त्यांसमोर हजर करणाऱ्यास ५ लाखांचं इनाम देण्याची घोषणाच यूपीतील एका काँग्रेस नेत्यानं केली आहे.

देशातील सर्वात मोठं राज्य असलेल्या उत्तर प्रदेशसह पाच राज्यांतील निवडणुकांमध्ये काँग्रेसला यश मिळवून देण्यासाठी राहुल गांधी यांनी प्रशांत किशोर यांची मदत घेतली होती. मात्र, पंजाब वगळता सर्वच राज्यांत काँग्रेसला सत्तेपासून दूर राहावं लागलं. पंजाबमध्ये कॅप्टन अमरिंदर सिंग यांच्या करिष्म्यामुळं सत्ता आली. यूपीमध्ये तर काँग्रेस आणखी तळाला गेला. दिल्लीत पराभूत झालेल्या वयोवृद्ध शीला दीक्षित यांना मुख्यमंत्रिपदाच्या उमेदवार म्हणून घोषित करणं, त्यानंतर समाजवादी पक्षाशी आघाडी करणं अशा अनाकलनीय निर्णयाचा त्यात फार मोठा वाटा होता. प्रशांत किशोर यांच्या रणनीतीनुसारच हे निर्णय घेण्यात आल्याचं बोललं जात होतं. त्यामुळं यूपीतील पराभवासाठी प्रशांत किशोर यांनाच जबाबदार धरलं जात आहे.

यूपीच्या निकालानंतर प्रशांत किशोर मीडियासमोर आलेलेच नाहीत. त्यामुळं काँग्रेसचे कार्यकर्ते व नेते संतापले आहेत. उत्तर प्रदेश काँग्रेस समितीचे सरचिटणीस राजेश सिंग यांनी लखनऊ येथील पक्ष कार्यालयाबाहेर पोस्टर झळकावून प्रशांत किशोर यांना शोधून आणणाऱ्यास इनाम जाहीर केलं आहे. तमाम कार्यकर्त्यांच्या वतीनं हे पोस्टर लावल्याचं त्यांनी म्हटलं आहे. 'गेले वर्षभर आम्ही प्रचंड मेहनत घेतली. कुठलाही उलट प्रश्न न करता किशोर सांगतील तसं करत गेलो. पक्षाचं भलं होईल, म्हणून शांत राहिलो. पण आता आम्हाला उत्तरं हवीत,' असं सिंग यांनी म्हटलं आहे.

काँग्रेसचे प्रदेशाध्यक्ष राज बब्बर यांनी मात्र कार्यकर्त्यांना ही पोस्टर्स काढण्याचे आदेश दिले आहेत. पराभवाबद्दल इतक्या लवकर निष्कर्ष काढून एखाद्याला दोष देणं योग्य नसल्याचं त्यांनी म्हटलं आहे.