माजी मंत्र्यांच्या जावयाकडे कुबेराचा खजिना

मटा ऑनलाइन वृत्त । बंगळुरू

कर्नाटकचे माजी मुख्यमंत्री आणि माजी केंद्रीयम मंत्री एस. एम. कृष्णा यांचे जावई आणि 'कॅफे कॉफी डे'चे मालक व्हि.जी. सिद्धार्थ यांच्या घर आणि कार्यालयावर आयकर विभागाने मारलेल्या धाडीत कुबेराचा खजिनाच सापडला आहे. सिद्धार्थ यांच्या चेन्नई, बंगळुरू, हासन, चिकमगलूर आणि मुंबईसहीत २५ ठिकाणच्या कार्यालयावर छापे मारण्यात आले असून या छाप्यात आयकर विभागाला ६५० कोटींची बेहिशोबी मालमत्ता सापडली आहे.

कॅफे कॉफी डेचं मुख्यालय बंगळुरू येथे आहे. व्ही. जी. सिद्धार्थ हे टुरिजम, आयटीसह इतर व्यवसायातही आहेत. आयकर विभागाने दिलेल्या माहितीनुसार, सिद्धार्थ यांच्याकडे आतापर्यंत ६५० कोटी रूपयांच्या बेहिशोबी मालमत्तेची माहिती मिळाली आहे. हा आकडा आणखी वाढू शकतो. या प्रकरणात नियमांचं उल्लंघन केल्याच्या अनेक गोष्टी समोर आल्या असून त्याच्याशी संबंधित ठोस पुरावेही मिळाले आहेत. दरम्यान, या छापेमारीबाबत एस. एम. कृष्णा किंवा सिद्धार्थ यांच्याकडून कोणतीच प्रतिक्रिया आलेली नाही.

सिद्धार्थ हे कॅफे कॉफी डेचे मालक असून देशातील कॉफीच्या बियाणांचे सर्वात मोठे निर्यातदारही आहेत. काही आयटी कंपनीतही त्यांची भागीदारी आहे. तर त्यांचे सासरे एस. एम. कृष्णा हे अनेक दशके काँग्रेसमध्ये होते. कर्नाटकचे मुख्यमंत्री, महाराष्ट्राचे राज्यपाल आणि केंद्रीय परराष्ट्र मंत्री म्हणून त्यांनी काम पाहिले आहे. यावर्षी मार्चमध्ये त्यांनी भाजपमध्ये प्रवेश केला होता.