​पोलीस हवालदाराकडे सापडली ७० कोटींची रोकड

मटा ऑनलाइन वृत्त । बेंगळुरू

कर्नाटकामधील चित्रदुर्ग येथील एका पोलीस हवालदाराकडे तब्बल ७० कोटींची रोकड सापडली आहे. ही सर्व रोकड तुर्कीश चलनाची असून बेकायदेशीरपणे भारतीय चलनात रुपांतर करण्यासाठी ही रोकड बंगळुरूमध्ये आणली होती. याप्रकरणी पोलीस हवालदारासह त्याच्या अन्य तीन साथीदारांना पोलिसांनी अटक केली आहे.

नागराज उर्फ नागाराजू असे या पोलीस हवालदाराचे नाव आहे. तो कोटे पोलीस स्टेशनमध्ये कार्यरत आहे. चित्रदुर्गमधील प्राथमिक शाळेत शिक्षक असलेल्या शिवाराजू तिप्पान्ना (वय ५०), मुरली अर्फ प्रोडूसर मुरली (वय ४०) आणि अरविंद प्रसाद (वय ४०) या तीन साथीदारांनाही पोलिसांनी अटक केली, अशी माहिती पोलीस आयुक्त प्रवीण सूद यांनी दिली. नागराज हा शहरातील एका व्यावसायिकाच्या संपर्कात होता. व्यावसायिकाकडून तुर्कीश नोटांचे भारतीय चलनात रुपांतर करण्याच्या प्रयत्नात असताना त्याला अटक केली, अशी माहिती अतिरिक्त पोलीस आयुक्त हेमनाथ निंबाळकर यांनी दिली.

नागराज हा तुर्कीश चलन बदलासाठी येत असल्याची माहिती व्यावसायिकाने पोलिसांना दिली. पोलिसांनी सापळा रचून मराठाहल्ली पुलाजवळ नागराजला अटक केली. नागराजने आमच्यावर सर्विस रिव्हॉल्वरमधून गोळी झाडली, असेही पोलिसांनी सांगितले. नागराजने १०० कोटी रुपयांच्या रकमेचे भारतीय चलनात रुपांतर करण्यासाठी प्रयत्न केले होते, असे निंबाळकर यांनी सांगितले. नागराज हा हवाला रॅकेटमध्ये सहभागी असण्याचीही शक्यता आहे, असे पोलीस आयुक्त सूद म्हणाले.