मोहनलालच्या 'महाभारत' सिनेमाला RSS चा विरोध

मटा ऑनलाइन वृत्त । नवी दिल्ली

मल्ल्याळम अभिनेते मोहनलाल यांची प्रमूख भूमिका असलेल्या १००० कोटींच्या 'महाभारत' या चित्रपटाची घोषणा होताच त्यावर वाद सुरू झाला आहे. मोहनलाल यांची तुलना 'छोटा भीम'शी करत सोशल मीडियातून टीका करण्यात येत आहे. 'केआरके'नेही याची खिल्ली उडवलीय. आता या वादात राष्ट्रीय स्वयंसेवक संघाने उडी घेत चित्रपटाला विरोध केला आहे.

'महाभारत' हा चित्रपट साहित्यिक एम. टी. वासुदेवन यांच्या 'रंदमुझम' कादंबरीवर आधारित आहे. 'रंदमुझम' या कादंबरीबद्दल वासुदेवन यांचा ज्ञानपीठ पुरस्काराने गौरव करण्यात आला आहे. 'रंदमुझम'मध्ये भीमच्या नजरेतून महाभारताचे वर्णन करण्यात आले आहे आणि याच एम.टी वासुदेवन यांना संघाचा विरोध आहे.

एम.टी. वासुदेवन यांच्या विकृत लिखाणाला महाभारत म्हणणं चुकीचं आहे. 'रंदमुझम'वर १० हजार कोटींचा सिनेमा बनवा अथवा १००० कोटींचा ते महाभारत ठरूच शकत नाही. यामुळे चित्रपटाला महाभारत हे नाव देण्याविरोधात आम्ही कायदेशीर कारवाई करण्याच्या विचारात आहोत. 'रंदमुझम'ला महाभारताचा भाग म्हणणंही चुकीचं आहे. महाभारत या धर्मग्रंथाशी 'रंदमुझम'ला जुळवल्यास समाजातील पिढ्यांवर त्याचा वाईट परिणाम होईल. म्हणूनच निर्मात्यांनी निर्णय न बदलल्यास आम्ही कायदेशीर कारवाई करू, असा इशारा संघाच्या केरळ शाखेने आपल्या अधिकृत फेसबुक पेजवरील पोस्टमधून दिला आहे.

संयुक्त अरब अमिरातीतील भारतीय उद्योजक बी. आर. शेट्टी या हजार कोटीच्या 'महाभारत' सिनेमाची निर्मिती करणार आहे. आशियातील हा दुसरा सर्वाधिक बजेटचा सिनेमा आहे. सप्टेंबर २०१८ मध्ये या सिनेमाचं शुटिंग सुरू होणार आहे. हा सिनेमा जाहीरात निर्माते श्रीकुमार मेनन हे दिग्दर्शित करतील. या सिनेमाचा पहिला भाग २०२० ला प्रदर्शित होईल. यानंतर ९० दिवसांनी दुसरा भाग प्रदर्शित केला जाईल. हा सिनेमा इंग्रजी, हिंदी, मल्ल्याळम, कन्नड, तमिळ आणि तेलुगुमध्ये डब केला जाणार आहे, अशी माहिती सूत्रांनी दिली.