मोहन भागवत लखनऊतील मशिदीला भेट देणार

मटा ऑनलाइन वृत्त । लखनऊ

राष्ट्रीय स्वयंसेवक संघाचे सरसंघचालक मोहन भागवत यांची मंदिराला भेट, हे काही नवीन नाही. पण ते लवकरच एका मशिदिला भेट देणार आहेत हे मात्र विशेष आहे. ऑल इंडिया मुस्लिम पर्सनल वुमेन लॉ बोर्डा (AIMPWLB) च्या अध्यक्ष शाइस्ता अंबर यांच्यासोबत भागवत यांची बैठक झाली. या बैठकीत भागवत यांनी लखनऊतील मशिदीला भेट देण्याचं आश्वासन दिलं.

लखनऊतील मोहनलालगंज इथल्या माधव आश्रमाच्या एका कार्यक्रमाच्या निमित्ताने मंगळवारी भागवत आणि अंबर यांची भेट झाली. 'माधव आश्रमाजवळच आम्ही नवीन अंबर मशिद बांधली आहे. या मशिदीच्या भेटीसाठी आम्ही भागवत यांना निमंत्रण दिलं. भागवत यांनी हे निमंत्रण स्वीकारलं आहे. लखनऊच्या आगामी दौऱ्यात आपण मशिदीला भेट देऊ असं आश्वासन त्यांनी दिलं, अशी माहिती अंबर यांनी दिली.

राष्ट्रीय स्वयंसेवक संघ फक्त हिंदुत्वाचा अजेंडा राबवतो आणि ते मुस्लिम विरोधी आहे, असा जो आरोप केला जातो तो भागवतांच्या मशिद भेटीमुळे दूर होईल. तसंच दोन्ही समाजातील गैरसमज दूर होऊन एकोपा वाढण्यास मदत होईल. खासकरून संघाबाबत मुस्लिमांच्या मनात असलेला द्वेष दूर करता येईल, असं ऑल इंडिया मुस्लिम पर्सलन वुमेन लॉ बोर्डला वाटतं. 'लखनऊतील कार्यक्रमात भागवत देशाचा विकास आणि समाजिक मुद्द्यांवर बोलले. त्यांच्या भाषणात आक्षेपार्ह असं काहीही नव्हतं', असं अंबर म्हणाल्या.