राम मंदिराला राजकारण्यांचा विरोध: भागवत

मटा ऑनलाइव वृत्त । रांची

राम मंदिराला मुस्लिमांचा विरोध नाही. तर राजकारणी आणि गुंडांचा विरोध आहे, अशी प्रतिक्रिया राष्ट्रीय स्वंयसेवक संघाचे सरसंघचालक मोहन भागवत यांनी व्यक्त केली. भागवत यांच्या या विधानामुळे राम मंदिराचा मुद्दा परस्पर सहकार्याने आणि समजूतीने सोडविण्यावर एकमत होत असल्याचं चित्र निर्माण झालं आहे.

झारखंडच्या देवघरमध्ये ते बोलत होते. राम मंदिराला मुस्लिम किंवा ख्रिश्चन समाजाचा कधीच विरोध नव्हता. केवळ काही कट्टरतावादी राजकारणी आणि गुंड राम मंदिराला विरोध करत असल्याचं भागवत म्हणाले. राम मंदिराच्या वादावर कोर्टात तोडगा निघणार असल्याचंही सांगून राम मंदिराबाबत सर्वोच्च न्यायालयाने व्यक्त केलेल्या विधानाशी भागवत यांनी सहमतीही दर्शवली.

काही दिवसापूर्वी सर्वोच्च न्यायालयाने कोर्टाबाहेर हा प्रश्न परस्पर सहकार्यानं सोडविण्याचे निर्देश दिले होते. 'राम मंदिरासारख्या संवेदनशील प्रकरणांवर परस्पर समजुतीने तोडगा काढल्यास योग्य होईल. दोन्ही पक्षांनी यावर तोडगा काढण्याचे प्रयत्न करायला हवे. जर असं झाल्यास कोर्टही मध्यस्थी करेल. दोन्ही पक्ष चर्चेसाठी तयार असल्यास एखाद्या न्यायाधीशांना मध्यस्थाची भूमिका घ्यायला सांगितलं जाऊ शकतं. मी स्वत:ही यासाठी तयार आहे,' असं मत सर्वोच्च न्यायालयाचे मुख्य न्यायाधीश जे.एस. खेहर यांनी व्यक्त केलं होतं.