...तर अमित शहा यांच्या मुलाची चौकशी करा

मटा ऑनलाइन वृत्त । भोपाळ

भारतीय जनता पक्षाचे राष्ट्रीय अध्यक्ष अमित शहा यांचा मुलगा जय शहा यांच्यावर आरोप-प्रत्यारोपांच्या फेरी सुरू असतानाच राष्ट्रीय स्वयंसेवक संघाने त्यावर पहिल्यांदाच प्रतिक्रिया दिली आहे. जय शहा यांच्यावर प्राथमिकदृष्ट्या आरोप सिद्ध होत असेल तर त्यांची चौकशी झाली पाहिजे, असं संघाचे सहसरकार्यवाह दत्तात्रय होसबळे यांनी म्हटलं आहे.

भोपाळ येथे संघाच्या बैठकीचं आयोजन करण्यात आलं होतं. त्यावेळी बोलताना होसबळे यांनी ही प्रतिक्रिया व्यक्त केली. ते म्हणाले, 'कोणाच्याही भ्रष्टाचाराची चौकशी व्हायलाच हवी. प्राथमिकदृष्ट्या जय यांच्यावर आरोप सिद्ध होत असतील तर त्यांची चौकशी झाली पाहिजे. मात्र हे आरोप करणाऱ्यांनी आधी ते सिद्ध करायला हवेत.'

यावेळी होसबळे यांनी नोटाबंदीचं समर्थन केलं. 'नोटाबंदी जनतेने स्वीकारली आहे आणि येणाऱ्या काळात त्याचे सकारात्मक परिणाम दिसून येतील, असं ते म्हणाले. जी विचारधारा आमच्याकडून पराभूत झाली. आज तेच लोक आमच्यावर केरळमध्ये हल्ला करत आहेत, अशी टीका त्यांनी डाव्यांवर केली. देश अजूनही नाजूक स्थितीतून जात आहे. लोकशाहीत चर्चा होणं आवश्यक आहे. लोकांनी त्यांचं मत मांडलं पाहिजे, असं ते म्हणाले. सरसंघचालकांनी दसरा मेळाव्यात केलेलं भाषण हे संघाचं धोरण आहे. त्या भाषणाला चांगला प्रतिसाद मिळाला आहे, असा दावा त्यांनी केला.