कन्नूर: शबरीमला मंदिरात महिलांनी प्रवेश केल्यानंतर भाजप-संघासह हिंदुत्वादी संघटनांनी सुरू केलेल्या आंदोलनाला राज्यात हिंसक वळण लागले आहे. ठिकठिकाणी झालेल्या हिंसक आंदोलनानंतर कन्नूरमध्ये मार्क्सवादी कम्युनिस्ट पक्षाच्या आमदाराच्या घरावर बॉम्ब हल्ला करण्यात आला. या घटनेच्या काही वेळेनंतर भाजप नेते, राज्यसभा खासदार व्ही. मुरलीधर यांच्या घरावरदेखील काही अज्ञातांनी गावठी बॉम्बने हल्ला केला. या बॉम्ब हल्ल्यात कोणीही जखमी झाले नाही.
माकप नेते शशी यांच्या घरावरही सकाळी ११ वाजण्याच्या सुमारास हल्ला करण्यात आला. यात घराचे नुकसान झाले. तर, इरिट्टी परिसरात एका माकप कार्यकर्त्यावर चाकूने वार करण्यात आले. थलासरीतच माकपच्या विभागीय समितीचे सदस्य व्ही. शशी यांच्यावर सायंकाळी ५.४५ वाजण्याच्या सुमारास चार बाईकस्वारांनी हल्ला केला. यानंतर घरावर देशी बॉम्ब फेकले व घरातील सामनाची नासधूस केली. यावेळी घरात कोणीही उपस्थित नव्हते. या हल्ल्याच्या काही वेळेनंतर थिरुवनगाड येथे राष्ट्रीय स्वयंसेवक संघाचे नेते के. चंद्रशेखरन यांच्या घरावर हल्ला करण्यात आला.
केरळ पोलिसांनी दिलेल्या माहितीसाठी कन्नूरमध्ये शुक्रवारी रात्री झालेल्या हिंसक घटनांप्रकरणी ३३ जणांना अटक करण्यात आली आहे. पाथनामथित्ता जिल्ह्यात झालेल्या हिंसाचार प्रकरणी ७६ जणांविरोधात गुन्हा नोंदवण्यात आला असून २५ जणांना रिमांडमध्ये घेण्यात आले आहे. तर, २०४ जणांना ताब्यात घेतले आहे. हिंसाचार प्रकरणात ११० जणांना अटकही करण्यात आली आहे.