'प्रियांका या नकली गांधी, त्यांनी फिरोज नाव लावावं'

लखनऊ: 'प्रियांका गांधी या नकली 'गांधी' आहेत. त्यांनी आपल्या नावापुढं फिरोज लावायला हवं,' असा टोला केंद्रीय मंत्री साध्वी निरंजन ज्योती यांनी हाणला आहे.

भगव्या कपड्यावरून प्रियांका गांधी यांनी उत्तर प्रदेशचे मुख्यमंत्री योगी आदित्यनाथ यांच्यावर टीका केली होती. 'योगी हे भगव्या वेषात असतात. भगवा हे हिंदू धर्माचं प्रतीक आहे. मात्र, त्यात हिंसाचार व सूडाच्या भावनेला स्थान नाही. हा देश करुणेचं प्रतीक असलेल्या प्रभू रामचंद्र आणि कृष्णाचा आहे. पण मुख्यमंत्री योगी हे सूडाची भाषा करतात,' असा आरोप त्यांनी केला होता. त्याला साध्वी ज्योती यांनी उत्तर दिलं आहे.

वाचा: ‘हिंसा आणि बदल्याच्या भावनेला देशात स्थान नाही’

'प्रियांका गांधी यांना भगव्या रंगाचा अर्थ कळणार नाही. कारण, त्या नकली गांधी आहेत. त्यांनी 'भगवा' शब्दाचा अभ्यास करायला हवा. आधी त्यांनी आपल्या नावातील गांधी हटवून त्या जागी फिरोज लावायला हवं,' असं ज्योती यांनी म्हटलं आहे. 'गुन्हेगारांच्या विरोधात योगी सरकार करत असलेली कठोर कारवाई प्रियांकाच्या पचनी पडत नाहीए. दंगलखोरांना पाठीशी घालण्याची प्रियांकांची भूमिका असेल तर त्यांनी पुढं येऊन तसं स्पष्ट करायला हवं. ज्यांनी निष्पाप लोकांना मारलं. पोलिसांवर दगडफेक केली. त्यांना शिक्षा व्हायला हवी की नको, हे प्रियांकांनी एकदा सांगून टाकावं,' असं आव्हानही साध्वी ज्योती यांनी दिलं.
वाचा: 'नथुराम गोडसेचं मंदिर बांधणाऱ्यांकडून काय अपेक्षा करणार?

वाचा: प्रियांका गांधींचा विना हेल्मेट प्रवास; ६,१०० चा दंड