शिवराज सिंह नाटकी, मोदी राष्ट्रभक्तः साध्वी

मटा ऑनलाइन वृत्त । उज्जैन

मध्य प्रदेशात सुरू असलेल्या सिंहस्थ कुंभ मेळ्यात क्षिप्रा नदीत पवित्र स्नान करण्यापासून रोखल्याने संतप्त झालेल्या साध्वी प्रज्ञा ठाकुरने मध्य प्रदेशचे मुख्यमंत्री शिवराजसिंह चौहान यांच्यावर शाब्दिक हल्ला चढवला. 'शिवराज हे पूर्ण नाटकी असून पंतप्रधान नरेंद्र मोदी हेच खरे राष्ट्रभक्त आहेत', असे साध्वी प्रज्ञा सिंह ठाकुर म्हणाल्या.

उज्जैन येथे एका पत्रकार परिषदेत बोलताना साध्वी म्हणाल्या, 'ज्या लोकांनी मला त्रास दिला त्या लोकांना याचे परिणाम भोगावे लागतील'. 'मालेगाव बॉम्बस्फोटप्रकरणी नुकतीच राष्ट्रीय तपास संस्थेने (एनआयए) साध्वी यांना क्लीन चिट दिली आहे. याविषयी बोलताना साध्वी म्हणाल्या, 'मी ऐकलेय की मला एनआयएने क्लीन चिट दिली आहे', परंतु ८ वर्षानंतर न्याय मिळत असेल तर तो माझ्यावर अन्याय आहे.



सिंहस्थ कुंभ मेळ्यात पवित्र नदीत स्नान करण्यासाठी आडून बसलेल्या साध्वींना सुरक्षाचे कारण देत प्रशासनाने स्नान करण्यापासून रोखले होते. त्यानंतर साध्वींने आमरण उपोषण सुरू केले. २१ मेपर्यंत परवानगी मिळाली नाही तर मी या ठिकाणी समाधी घेईन, असा इशारा देताच प्रशासनाने साध्वींना परवानगी दिली.

दरम्यान, मालेगावमध्ये २००८ साली झालेल्या बॉम्बस्फोटप्रकरणी महाराष्ट्र एटीएसने साध्वी प्रज्ञा सिंह ठाकुरला मुख्य आरोपी बनवले होते. त्यानंतर याचा तपास एनआयएकडे सोपवला होता. साध्वींविरोधात सबळ पुरावा न मिळाल्याने नुकतीच एनआयएकडून क्लीन चिट देण्यात आली आहे.