आजारपणानंतर प्रथमच संसदेत आल्या स्वराज!

मटा ऑनलाइन वृत्त । नवी दिल्ली

डिसेंबर महिन्यात किडनी प्रत्यारोपणाची शस्त्रक्रिया झाल्यानंतर घरूनच परराष्ट्र खात्याचं कामकाज सांभाळणाऱ्या सुषमा स्वराज आज संसदेत उपस्थित राहिल्या आणि लोकसभेत त्यांनी निवेदनही केलं. तुम्हा सर्व सदस्यांच्या शुभेच्छा आणि कृष्णकृपेमुळेच मी बरी होऊन सदनात परतली आहे, अशा भावना त्यांनी व्यक्त केल्या, तेव्हा सर्वांनीच बाकं वाजवून त्यांचं स्वागत केलं.

गेल्या वर्षाच्या शेवटी सुषमा स्वराज यांची प्रकृती खालावली होती. त्यांची किडनी निकामी झाल्याचं चाचण्यांमधून स्पष्ट झालं होतं. त्यानंतर, १० डिसेंबर रोजी दिल्लीच्या एम्स हॉस्पिटलमध्ये त्यांच्यावर किडनी प्रत्यारोपणाची शस्त्रक्रिया करण्यात आली होती. तेव्हापासून त्या घरीच विश्रांती घेत होत्या. अर्थात, ट्विटरवर त्या सक्रिय होत्या आणि अनेकांना मदतही करत होत्या.

या दरम्यानच्या काळातच, अमेरिकेत तीन भारतीय व्यक्तींवर हल्ले झाले होते. २२ फेब्रुवारीला भारतीय इंजिनीअर श्रीनिवास कुचिभूतला याची कॅन्सस शहरात गोळी मारून हत्या करण्यात आली होती. त्यानंतर, व्यावसायिक हरनीश पटेल यांच्यावरही गोळी झाडण्यात आली होती. सिअॅटलमध्ये दीप राय या भारतीयावरही प्राणघातक हल्ला झाला होता. अमेरिका सोडून तुमच्या देशात चालते व्हा, अशी धमकीच गोळी झाडणाऱ्या गोऱ्यांनी दिली होती. या संदर्भात, सुषमा स्वराज यांनी लोकसभेत निवेदन केलं. अमेरिकेतील भारतीयांच्या सुरक्षेसाठी केंद्र सरकार कटिबद्ध असल्याची ग्वाही त्यांनी यावेळी दिली.

अमेरिकेतील पीडित कुटुंबीयांना भारत सरकारने तातडीने मदत पोहोचवली आहे. श्रीनिवास आणि दीप राय यांच्या कुटुंबीयांशी मी स्वतः बोलले आहे. तसंच, अमेरिकन प्रशासनाशीही संपर्क साधून भारतीयांच्या सुरक्षेसाठी उपाययोजना करण्याची सूचनाही केली आहे, अशी माहिती स्वराज यांनी दिली.