केंद्रीय गृहमंत्री नव्हे, माझी 'गृह'मंत्री जिंकेल: शत्रुघ्न सिन्हा

लखनऊ:

काँग्रेसमध्ये प्रवेश केल्यानंतरही अभिनेते शत्रुघ्न सिन्हा त्यांच्या पत्नी आणि समाजवादी पार्टीच्या उमेदवार पूनम सिन्हा यांचा प्रचार करत आहेत. त्यांच्या पूनम सिन्हा या केंद्रीय गृहमंत्री राजनाथ सिंह यांच्याविरोधात लखनऊमधून लढत आहेत. त्यामुळे माझ्या घरातल्या 'गृह'मंत्री देशाच्या गृहमंत्र्यांना वरचढ ठरणार असल्याचं सांगत शत्रुघ्न सिन्हा त्यांच्या खास शैलीत भाजपवर शरसंधान साधत आहेत.

शत्रुघ्न सिन्हा यांनी भाजपला सोडचिठ्ठी देत नुकताच काँग्रेसमध्ये प्रवेश केला. तर त्यांच्या पत्नी पूनम सिन्हा समाजवादी पार्टीच्या तिकीटावर लखनऊमधून राजनाथ सिंह यांच्याविरोधात लढत आहेत. काँग्रेस नेते असले तरी पती धर्म म्हणून शत्रुघ्न सिन्हा पूनम यांच्यासाठी लखनऊमध्ये प्रचारसभा घेत आहेत. यावेळी ते लखनऊकरांशी संवाद साधत बसपा प्रमुख मायावती आणि सपाचे नेते अखिलेश यादव यांची तोंडभरून स्तुतीही करत आहेत. 'मायावती का कमाल और अखिलेश का धमाल रंग लाएगा' अशा शब्दात या दोन्ही नेत्यांचं ते कौतूक करत आहेत. त्याचवेळी भाजपवर टीका करताना पत्नीसाठीही मतं मागत आहेत.

अखिलेश यादव यांनी लखनऊच्या विकासासाठी दिलेल्या योगदानासमोर मोदी सरकार निव्वळ जुमलेबाजी करत आहे. मेक इन इंडिया, डिजिटल इंडिया, स्टँड अप इंडिया यासारख्या योजना अयशस्वी ठरल्या असून भाजपने दिलेली आश्वासनं पूर्ण केली नाहीत. केवळ एकट्या उत्तर प्रदेशातच ५० लाख तरुण बेरोजगार झाले आहेत, असं त्यांनी सांगितलं. सभेसाठी जमलेल्या गर्दीचा उत्साह बघून 'हा विजय समारंभ आहे' असे ते म्हणाले. यावेळी त्यांनी मोदींना 'माजी पंतप्रधान' तर अखिलेश यादव यांना 'युवा आयकॉन' असं संबोधत 'आमच्या घरातल्या 'गृह'मंत्री पूनम सिन्हा भारताचे सध्याचे गृहमंत्री राजनाथ सिंह यांना वरचढ ठरतील', असं ते म्हणाले. ही निवडणूक 'चौकीदार' आणि 'ठेकेदार' यांना पळवून लावणारी आहे, असा टोलाही त्यांनी हाणला. तर अखिलेश यादव यांनी सपाने या आधी केलेल्या विकासकामांना पाहून मतदान करा, असं आवाहन मतदारांना केलं.