आयोध्येत राम मंदिर उभारणीसाठी सपाचे १५ कोटी

मटा ऑनलाइन वृत्त । लखनऊ

उत्तर प्रदेश विधानसभेच्या निवडणुकीत सपाटून मार खाल्ल्यानंतर समाजवादी पार्टीने रणनिती बदलायला सुरूवात केली आहे. आयोध्येत राम मंदिर उभारण्याचे समर्थन करतानाच राम मंदिर उभारण्यासाठी १५ कोटी रूपये देण्याची घोषणा सपाने केली आहे.

समाजवादी पार्टीचे नेते बुक्कूल नवाब यांनी ही घोषणा केली आहे. कोणत्याही परिस्थितीत आयोध्येत राम मंदिर व्हायलाच हवे. रामाचा जन्मच आयोध्येत झाला होता. त्यामुळे त्यांचे मंदिर आयोध्येत व्हायलाच हवे, असा आग्रह धरतानाच आपल्या मालकीच्या जमीनीच्या विक्रीतून येणाऱ्या रकमेतील १५ कोटी रूपये राम मंदिर बांधण्यासाठी देण्यात येईल. त्याशिवाय आयोध्येत राम मंदिर झाल्यावर प्रभू रामाला १० लाखाचा मुकुट अर्पण करेन, असे ते म्हणाले.

माझ्या जमिनीचा वापर सरकारने गोमती रिव्हरफ्रंटसाठी केला आहे. सरकारकडून आपल्याला आणखी २० कोटी रूपये भरपाई मिळणार आहे. परंतु, सरकारने अजूनही भरपाई दिलेली नाही. जेव्हा सरकार जमिनीचा मोबदला देईल, लगेच त्यातील ५० टक्के रक्कम राम मंदिराच्या निर्मितीसाठी दान करण्यात येईल, असे त्यांनी सांगितले.