शशिकला यांच्याविरोधात अपहरणाचा गुन्हा

मटा ऑनलाइन वृत्त । मदुराई

बेहिशोबी मालमत्ता प्रकरणी दोषी ठरलेल्या अण्णा द्रमुकच्या सर्वेसर्वो शशिकला नटराजन आणखी गोत्यात आल्या आहेत. त्यांच्याविरोधात त्यांच्याच पक्षाच्या एका आमदारानं अपहरणाचा गुन्हा दाखल केल्यानं शशिकला यांची डोकेदुखी वाढली आहे.

तामिळनाडूचे मुख्यमंत्री पन्नीरसेल्वम यांनी पक्षात बंड केल्यानंतर तामिळनाडूच्या राजकारणात राजकीय भूकंप झाला होता. अण्णा द्रमुकचे आमदार पन्नीरसेल्वम यांच्या गळाला लागू नये म्हणून शशिकला यांनी आमदारांना एका हॉटेलमध्ये ठेवले होते. त्यात मदुराईचे आमदार सर्वनन हे सुद्धा होते. या हॉटेलमधून आज सुटका झाल्यानंतर सर्वनन यांनी मदुराईच्या कुवथूर पोलीस ठाण्यात शशिकला आणि अण्णा द्रमुकचे नवनिर्वाचीत नेते पलानीसामी यांच्याविरोधात अपहरणाचा गुन्हा दाखल केला आहे. त्यामुळे शशिकला यांची चांगलीच कोंडी झाली आहे.



अन् शशिकला भावूक झाल्या

बेहिशोबी मालमत्ता प्रकरणी शशिकला यांना ४ वर्षाची शिक्षा ठोठावण्यात आली आहे. आज संध्याकाळी त्या ट्रायल कोर्टात शरणागती पत्करण्याची शक्यता आहे. तुरुंगात जाण्याशिवाय कोणताच पर्याय समोर नसल्याच लक्षात आल्यानंतर शशिकला यांनी आज मरिना बीचवर जाऊन दिवंगत नेत्या जयललिता यांच्या समाधीवर पुष्पचक्र अर्पण करून श्रद्धांजली वाहिली. त्यावेळी त्या भावूक झाल्या. त्यांना अश्रू आवरणेही कठीण झाले होते.