शशिकलांनी उपसले भावनिक अस्त्र

मटा ऑनलाइन वृत्त । चेन्नई

तामिळनाडूचे काळजीवाहू मुख्यमंत्री ओ. पन्नीरसेल्वम (ओपी) यांनी दिलेले राजकीय आव्हान परतावून लावण्यासाठी अण्णा द्रमुकच्या सरचिटणीस शशिकला यांनी दक्षिणेच्या राजकारणात हमखास चालणारं भावनिक अस्त्र बाहेर काढलं आहे. अण्णा द्रमुकच्या आमदारांसमोर बोलताना आज शशिकला अक्षरश: रडल्या. 'अम्मांनी मोठ्या कष्टानं वाढवलेला अण्णा द्रमुक हा पक्ष कधीही संपू देणार नाही आणि कोणत्याही परिस्थितीत मुख्यमंत्रिपदावर ताबा मिळवूच,' अशी शपथच आज शशिकला यांनी पक्षाच्या आमदारांसमोर घेतली.

जयललितांच्या मृत्यूनंतर अण्णा द्रमुकच्या सरचिटणीसपदी आलेल्या शशिकला मुख्यमंत्रिपदी बसण्याच्या तयारीत आहेत. मात्र, तामिळनाडूचे सध्याचे काळजीवाहू मुख्यमंत्री ओ. पन्नीरसेल्वम यांनी त्यांच्याविरोधात बंड पुकारलं आहे. काही आमदार व मंत्र्यांना गळाला लावण्यातही ते यशस्वी झाले आहेत. ओपींच्या या फोडाफोडीला चाप लावण्यासाठी शशिकला कॅम्पचे आमदार सध्या एका हॉटेलात वास्तव्यास आहेत. याच आमदारांसमोर आज शशिकला यांनी भावनिक भाषण केले. 'अण्णा द्रमुकचं अस्तित्व कुणीही संपवू शकत नाही,' असं जयललितांनी अखेरच्या दिवसांत मला सांगितलं होतं. पक्षाच्या रूपात अम्मांनी एक मोठा वारसा आपल्यासाठी ठेवला आहे. तो वारसा आपण जपायलाच हवा. हा वारसा जपण्यासाठी आणि पक्ष वाचवण्यासाठी मी प्राणही देईन,' असं शशिकला म्हणाल्या. 'प्रत्येकानं अम्माच्या प्रतिमेच्या साक्षीनं ती शपथ घ्यायला हवी,' असंही त्या म्हणाल्या. हे भाषण करताना शशिकला यांना अश्रू अनावर झाले. 'अण्णा द्रमुकच्या आमदारांना कुणीही बंदी बनविलेले नाही. ते मुक्त आहेत,' असंही त्यांनी स्पष्ट केलं.

हे तर मगरीचे अश्रू!: ओपी

शशिकला यांच्या या अश्रूपूर्ण भाषणाची पन्नीरसेल्वम यांनी खिल्ली उडवली आहे. 'शशिकला यांनी मगरीचे अश्रू ढाळणं बंद करावं आणि आमदारांना त्यांच्या मतदारसंघात व घरी जाऊ द्यावं,' असं आव्हान ओपींनी दिलं आहे. 'शशिकला यांनी बंदीवासात ठेवलेले काही आमदार माझ्या संपर्कात आहेत. एका आमदारावर नजर ठेवण्यासाठी चार गुंड ठेवण्यात आले आहेत. त्यांचा छळ केला जात आहे. ते बाहेर पडू शकत नाहीत,' असा ठाम दावा ओपींनी केला.