पाहा: अमेरिकेच्या 'त्या' लष्करी तळाचे सॅटेलाइट फोटो

नवी दिल्ली: इराणने इराकमधील अमेरिकेच्या लष्करी तळावर केलेल्या क्षेपणास्त्र हल्ल्यात फारसं नुकसान झालं नाही, असा दावा राष्ट्राध्यक्ष डोनाल्ड ट्रम्प यांनी केला असताना घटनास्थळावरील वास्तव दाखवणारे सॅटेलाइट फोटो समोर आले असून त्यात लष्करी तळाचे मोठ्या प्रमाणात नुकसान झाल्याचे स्पष्टपणे दिसत आहे.

इराणमधील दुसरे सर्वोच्च नेते आणि कमांडर जनरल कासीम सुलेमानी यांची हत्या अमेरिकेने घडवून आणल्याने इराण आणि अमेरिका या दोन्ही देशांत संघर्ष पेटला आहे. सुलेमानी यांच्या हत्येचा बदला म्हणून इराणकडून प्रतिहल्ले केले जात आहेत. मंगळवारी मध्यरात्रीच्या सुमारास इराणने मोठा हल्ला करत इराकमधील अमेरिकेच्या दोन लष्करी तळांवर तब्बल २२ क्षेपणास्त्रे डागली. या हल्ल्यात अमेरिकेचे ८० सैनिक मारले गेल्याचा दावा नंतर इराणच्या सरकारी वृत्त वाहिनीवरून करण्यात आला. मात्र, अमेरिकेचे राष्ट्राध्यक्ष डोनाल्ड ट्रम्प यांनी बुधवारी पत्रकार परिषद घेऊन इराणचा दावा फेटाळला. इराणच्या हल्ल्यात आमचे किरकोळ नुकसान झाले आहे. आमचा एकही सैनिक मारला गेलेला नाही, असा दावा ट्रम्प यांनी केला. मात्र, आता अल-असद हवाईतळाचे सॅटेलाइट फोटो पुढे आले असून त्यात मोठ्या प्रमाणात नुकसान झाल्याचे स्पष्टपणे दिसत आहे.

बगदाद: अमेरिकी दूतावासाजवळ क्षेपणास्त्र हल्ला

रॉयटर्सच्या वृत्तानुसार, इराणच्या हल्ल्यात बगदादमधील अल-असद लष्करी हवाईतळावरील किमान सात इमारतींची मोठ्या प्रमाणात पडझड झाली आहे. त्यातही काही इमारती भुईसपाट झाल्या आहेत. सॅटेलाइट फोटोत ते अधिक स्पष्ट दिसत आहे. 'प्लॅनेट लॅब'ने अल-असद हवाईतळावरील हल्ल्यानंतरचे दोन सॅटेलाइट फोटो जारी केले आहेत. त्यात काही इमारतींची पडझड झाल्याचे दिसत आहे. याच हवाईतळाचे २५ डिसेंबरचे काही फोटो उपलब्ध असून ताजे फोटो व आधीचे फोटो पाहिल्यास झालेलं नुकसान स्पष्टपणे समोर येत आहे.

इराकमधल्या २५ हजार भारतीय कामगारांचं काय?

तणाव वाढतोय

दरम्यान, इराण आणि अमेरिकेतील संघर्ष तीव्र झाला असतानाच बुधवारी रात्री उशिरा पुन्हा एकदा इराकची राजधानी बगदादमधील सुरक्षेची तटबंधी असलेल्या ग्रीन झोनमध्ये दोन कत्युशा क्षेपणास्त्रे डागण्यात आली आहेत. या हल्ल्यात कोणतीही हानी झालेली नाही असा दावा, इराकी सैन्याने केला आहे. सूत्रांच्या म्हणण्यानुसार, अमेरिकेच्या दूतावासापासून अवघ्या १०० मीटर अंतरावर यातील एक क्षेपणास्त्र कोसळले. या हल्ल्याची अद्याप कुणीही जबाबदारी घेतलेली नाही. या हल्ल्याने तणावात मात्र भर पडली आहे.

अमेरिका-इराण संघर्ष ;पेट्रोल-डिझेल महागले