वृत्तसंस्था, नवी दिल्ली
'ऑगस्टा वेस्टलँड गैरव्यवहार प्रकरणातील माफीचा साक्षीदार राजीव सक्सेनाला परदेशात जायचे असले, तर त्याच्या दोन नातेवाइकांनी त्याच्या सुरक्षेसाठी प्रत्येकी पाच कोटी रुपये भरावेत,' असा आदेश सर्वोच्च न्यायालयाने दिला आहे. न्या. संजीव खन्ना आणि बी. आर. गवई यांच्या पीठाने हा आदेश दिला. सक्सेनाने आपल्याला रक्ताचा कर्करोग झाला असून, त्याच्या उपचारांसाठी परदेशात जाण्याची परवानगी मागणारी याचिका सर्वोच्च न्यायालयात दाखल केली होती. त्यावर न्यायालयाने मंगळवारी सुनावणी घेतली.
सक्सेनाच्या याचिकेवर सक्तवसुली संचालनालयाने (ईडी) आक्षेप घेतला होता. सक्सेना भारताबाहेर गेल्यावर तो पलायन करण्याची शक्यता आह. तो परतून भारतात येईल असे वाटत नाही. तसच, त्याचे भारतात कोणीही नातेवाइक नाही, असे 'ईडी'ने म्हटले आहे. परंतु, सर्वोच्च न्यायालयाने 'ईडी'लाही या वेळी सुनावले. 'सक्सेनाचा पासपोर्ट मर्यादित काळासाठी आहे. तुमची शंका बरोबर असेल किंवा चुकीचीसु्द्धा. परंतु, तुम्ही त्याला(सक्सेना) भारतात परत आणण्यासाठी असमर्थ आहात का,' असा सवालही न्यायालयाने 'ईडी'ला केला.
दरम्यान, सक्सेनाने त्याची बहीण आणि वहिनी भारतात असल्याचे म्हटले आहे. त्या सक्सेनाच्या परदेश गमनासाठी प्रत्येकी पाच कोटी रुपये भरतील का, अशी विचारणा न्यायालयाने केली असून, त्यांना विचार करण्यासाठी बुधवारपर्यंतचा वेळ देण्यात आला आहे. बुधवारी या प्रकरणाची पुढील कारवाई होणार आहे. सक्सेनाला उच्च न्यायालयाने दहा जून रोजी संयुक्त अरब अमिराती, युनायटेड किंग्डम आणि युरोपमध्ये वैद्यकीय उपचारांसाठी जाण्याची परवानगी दिली आहे.