बलात्कारानंतर कुणी I love you म्हणेल का?

नवी दिल्ली: 'पीपली लाइव्ह' चित्रपटाचे सह दिग्दर्शक महमूद फारुकी यांच्या विरोधातील बलात्काराची याचिका सर्वोच्च न्यायालयानं फेटाळून लावली आहे. फारुकी यांना निर्दोष मुक्त करण्याचा उच्च न्यायालयाचा निर्णय योग्य असल्याचा निर्वाळाही न्यायालयानं दिला. 'बलात्कारानंतर कोणती पीडित महिला बलात्काऱ्याला 'आय लव्ह यू' म्हणेल, असा रोकडा सवाल खंडपीठानं यावेळी एका ई-मेलचा संदर्भ देत फिर्यादी पक्षाच्या वकिलांना केला.

बलात्काराच्या आरोपाप्रकरणी फारुकी यांना सत्र न्यायालयानं दोषी ठरवलं होतं. उच्च न्यायालयानं कनिष्ठ न्यायालयाचा तो निर्णय फिरवत फारुकी यांना निर्दोष मुक्त केलं. त्या निर्णयाला पीडित महिलेनं सर्वोच्च न्यायालयात आव्हान दिलं होतं. न्यायाधीश एस. ए. बोबडे आणि न्यायाधीश एल. नागेश्वर राव यांच्या खंडपीठापुढं शुक्रवारी या प्रकरणाची पहिली सुनावणी झाली. या पहिल्याच सुनावणीत खंडपीठानं पीडित महिलेची आव्हान याचिका फेटाळून लावली. आधीपासूनच रिलेशनशीपमध्ये असलेल्या महिलेनं केलेल्या बलात्काराच्या आरोपांवर निर्णय देणं मोठं कठीण काम होतं. तरीही या प्रकरणात चांगला निर्णय दिला गेला असून यात हस्तक्षेप करण्याची गरज नाही, अशा शब्दांत खडंपीठानं उच्च न्यायालयाचं कौतुक केलं.

अॅड. वृंदा ग्रोवर आणि अनिंदिता पुजारी यांनी पीडित महिलेची बाजू मांडली. 'पीडित महिला व दिग्दर्शक हे केवळ परिचित होते. त्यांच्यात कोणतेही संबंध नव्हते. तसंच, या प्रकरणात आरोपीला सत्र न्यायालयानं ७ वर्षांची शिक्षा ठोठावली आहे,' याकडं पीडित महिलेच्या वकिलांनी लक्ष वेधले. त्यावर, 'तुम्ही ज्येष्ठ वकील आहात आणि बलात्काराची बरीच प्रकरणे तुम्ही हाताळली आहेत. बलात्कारानंतर किती पीडित व्यक्तीनी आरोपीला 'आय लव्ह यू' म्हटलेय, हे तुम्हीच सांगा,' अशी विचारणा खंडपीठानं पीडितेच्या वकिलांना केली. 'पीडित महिलेवर जबरदस्ती केल्याचा कोणताही पुरावा दिसत नाही. दोघांची चर्चा आणि त्यांच्या ई-मेलवरून हे दोघेही चांगले मित्र होते, असं दिसत असल्याचं नमूद करीत खंडपीठानं ही याचिका फेटाळून लावली.

ही बातमी इंग्रजीमध्ये वाचा