'पद्मावती' विरोधातील याचिका फेटाळली!

मटा ऑनलाइन वृत्त । नवी दिल्ली

'पद्मावती' चित्रपटाच्या प्रदर्शनाला स्थगिती देण्याची मागणी करणारी याचिका सर्वोच्च न्यायालयानं फेटाळून लावली आहे. 'चित्रपटाच्या प्रदर्शनाचा निर्णय सेन्सॉर बोर्डाला स्वतंत्रपणे घेऊ द्या,' असंही न्यायालयानं स्पष्ट केलं आहे. गेल्या काही दिवसांपासून प्रखर विरोधाचा सामना करावा लागलेले निर्माते-दिग्दर्शक संजय लीला भन्साळी यांना या निर्णयामुळं मोठा दिलासा मिळाला आहे.

ऐतिहासिक तथ्यांचा विपर्यास केल्याच्या आरोपांवरून 'पद्मावती' चित्रपटाला देशभरात विरोध होत आहे. या चित्रपटातून राणी पद्मिनीची मानहानी करण्यात आली आहे, असा हिंदुत्ववादी संघटनांचा आरोप आहे. राजपूत समाजानंही या चित्रपटाला आक्षेप घेतला आहे. या पार्श्वभूमीवर चित्रपटाच्या प्रदर्शनाला स्थगिती देण्याची मागणी करण्यात आली होती. मात्र, न्यायालयानं या संदर्भातील याचिकेवर सुनावणी करण्यास नकार दिला. 'सेन्सॉर बोर्ड आणि चित्रपट लवादाच्या अधिकारात न्यायालय हस्तक्षेप करू शकत नाही,' असं खंडपीठानं स्पष्ट केलं.