हवाई दलाच्या बेपत्ता विमानाचा शोध सुरूच

मटा ऑनलाइन वृत्त । चेन्नई


चेन्नईहून पोर्ट ब्लेअरला जात असताना रडारवरून गायब झालेल्या हवाई दलाच्या 'एएन ३२' या मालवाहू विमानाचा शोध सलग दुसऱ्या दिवशीही सुरूच आहे. बेपत्ता विमानाच्या शोधासाठी भारतानं हाती घेतलेली ही आतापर्यंतची सर्वात मोठी मोहीम असून या शोध मोहिमेची माहिती घेण्यासाठी संरक्षणमंत्री मनोहर पर्रिकर चेन्नईत दाखल झाले आहेत.
रडारवरून गायब झालेल्या या विमानात सैन्य दलातील वैमानिक, सहवैमानिक, नॅव्हिगेटर आणि ३ सहाय्यक तसेच हवाई दलाचा १ अधिकारी आणि १० कर्मचारी, लष्कराचे २ कर्मचारी, तटरक्षक दलाचा १ कर्मचारी आणि नौदलाचे ९ कर्मचारी होते. रडारवर आलेल्या शेवटच्या माहितीच्या आधारे विमान कुठे असेल याचा अंदाज बांधून शोध मोहीम हाती घेण्यात आली आहे. या मोहिमेसाठी ४ टेहळणी विमानं, ४ नौदलाची विमानं, १३ युद्धनौका आणि एका पाणबुडीचीही मदत घेण्यात आली आहे.

आणीबाणीच्या परिस्थितीत ए एन ३२ या विमानाला समुद्रात उतरवून पाण्यावर तरंगत्या अवस्थेत ठेवता येते. मात्र, वैमानिकाला ही संधी मिळाली की नाही?; हे विमानाविषयी ठोस माहिती हाती येईपर्यंत कळणार नाही, असं हवाई दलानं सांगितलं. बंगालच्या उपसागरात विमानाचे अवशेष आढळल्याचं वृत्त कुठूनही आलेलं नाही. त्यामुळे अजूनही काहीतरी चांगली बातमी येईल, या आशेवर आम्ही आहोत, असं हवाई दलाच्या प्रवक्त्यानं सांगितलं.