केरळ हाऊसमध्ये राष्ट्रवादीची बीफ पार्टी?

मटा ऑनलाइन वृत्त । नवी दिल्ली

दिल्लीच्या केरळ हाऊसमध्ये राष्ट्रवादी काँग्रेस पक्षाने बीफ पार्टी आयोजित केल्याची अफवा पसरल्याने कोणताही अनुचित प्रकार घडू नये म्हणून केरळ हाऊसच्या सुरक्षेत प्रचंड वाढ करण्यात आली आहे. त्यामुळे केरळ हाऊसला छावणीचं रूप आलं आहे.

केरळ हाऊसमध्ये काही राजकीय पक्षाचे कार्यकर्ते शनिवारी सायंकाळी ६.३० वाजता 'बीफ फेस्टिव्हल' साजरा करणार असल्याची माहिती आम्हाला मिळाली. त्यामुळे सुरक्षेच्या कारणास्तव आम्ही तिथे पोलिसांचा बंदोबस्त वाढवला, असं दिल्लीचे पोलीस उपायुक्त बी. के. सिंह यांनी सांगितलं. मात्र आम्हाला मिळालेली माहिती चुकीची होती, असं नंतर पोलिसांनी स्पष्ट केलं.

राष्ट्रवादी काँग्रेसने या बीफ पार्टीचे आयोजन केले असल्याची खबर होती. त्यामुळे पोलिसांनी राष्ट्रवादीचे नेते डि. पी. त्रिपाठी यांच्याशी संपर्क साधला असता त्यांनी हे वृत्त फेटाळून लावलं. विशेष म्हणजे भारतीय गोरक्षा क्रांतीच्या लोकांनी गेल्या आठवड्यात केरळमध्ये झालेल्या बीफ फेस्टिव्हलच्या विरोधात घोषणाबाजी देत दिल्लीच्या केरळ हाऊसमध्ये घुसले होते. या घटनेनंतर आम्ही केरळ हाऊसच्या सुरक्षेत वाढ करण्याची मागणी केली होती. दोन वर्षापूर्वीही केरळ हाऊसमध्ये बीफ पार्टी होणार असल्याची अफवा आल्यानंतर पोलिसांनी इथे धाड केली होती.