अमित शहांच्या सुरक्षेचा खर्च जाहीर करण्यास नकार

वृत्तसंस्था, नवी दिल्ली

भाजप अध्यक्ष अमित शहा यांच्या सुरक्षा व्यवस्थेवर झालेला खर्च जाहीर करण्यास केंद्रीय माहिती आयोगाने नकार दिला आहे. ‘व्यक्तिगत’ आणि ‘सुरक्षेशी संबंधित’ माहिती जाहीर करू नये, असे कलम माहिती अधिकार कायद्यात असून, त्याच्याच आधारे हा निर्णय घेतल्याचे आयोगाने म्हटले आहे.

दीपक जुनेजा यांनी ५ जुलै २०१४ रोजी आयोगाकडे अमित शहा यांच्या सुरक्षा खर्चाबाबत विचारणा केली होती. त्यावेळी शाह राज्यसभेचे खासदार नव्हते. मात्र, तरीही त्यांना सरकारकडून सुरक्षा पुरवली जात असल्याने जुनेजा यांनी त्याबाबत प्रश्न उपस्थित केले होते. अशी सरकारी सुरक्षा व्यवस्था एका खासगी व्यक्तीला देण्याबाबत आणि त्यावरील खर्चाबाबत काय नियम आहेत, अशी विचारणा त्यांनी ‘आरटीआय’अंतर्गत अर्जाद्वारे केली होती. मात्र, कोणत्याही व्यक्तीच्या जिवाला धोका निर्माण होईल, अशी माहिती उघड करण्यास ‘आरटीआय’च्या कलम ८ (१) (जी) अन्वये मनाई करण्यात आली आहे, या मुद्द्यावर तेव्हा गृहमंत्रालयानेही बोट ठेवले होते. त्याआधारे माहिती आयोगाने जुनेजा यांचा अर्ज फेटाळून लावला होता. आयोगाच्या निर्णयाला जुनेजा यांनी दिल्ली उच्च न्यायालयात आव्हान दिले होते. त्यावर न्यायलयाने हा मुद्दा पुन्हा माहिती आयोगाकडे सोपवला होता.