'भाजप, आरएसएसमध्ये महिलांशी भेदभाव'

मटा ऑनलाइन वृत्त । वडोदरा

भाजप आणि भाजपची मातृसंघटना असलेल्या राष्ट्रीय स्वयंसेवक संघामध्ये महिलांशी भेदभाव केला जातो, असा आरोप काँग्रेसचे उपाध्यक्ष राहुल गांधी यांनी आज केला. 'आपल्या आरोपाच्या समर्थनार्थ त्यांनी संघाच्या गणवेषाचा आधार घेतला. 'खाकी हाफ पँट हा राष्ट्रीय स्वयंसेवक संघाचा (आरएसएस) गणवेष आहे. पण, आरएसएसच्या शाखेवर कुणी महिलांना हाफ पँटमध्ये पाहिलंय का,' असा सवाल त्यांनी केला.

गेल्या काही दिवसांपासून राहुल गांधी मोदी सरकारविरोधात आक्रमक झाले आहेत. सरकारच्या ध्येयधोरणांबरोबरच ते भाजप व राष्ट्रीय स्वयंसेवक संघालाही लक्ष्य करत आहेत. गुजरात दौऱ्यात आज झालेल्या विद्यार्थी संवाद मेळाव्याला संबोधित करताना राहुल यांनी भाजप-संघावर भेदभावाचा आरोप केला. 'आरएसएस ही भाजपची मातृसंघटना आहे. या संघटनेत किती महिला आहेत? हाफ पँट हा त्यांचा ट्रेडमार्क आहे. पण कधी आरएसएसच्या शाखांवर महिलांना हाफ पँटमध्ये पाहिलंय का? मी तरी कधी पाहिलं नाही,' असं ते म्हणाले. 'जोपर्यंत महिला काही बोलत नाहीत. गप्प आहेत. तोपर्यंत सगळं ठीक आहे. पण जर का त्यांनी तोंड उघडलं तर त्यांना लगेच गप्प करायचं. ही भाजपची नीती आहे,' असा हल्लाबोल राहुल यांनी केला.

'विद्यार्थ्यांना, तरुणांना नेमकं काय हवं आहे याची विचारणा मोदींनी कधी केलीय का,' असा सवालही त्यांनी केला. 'काँग्रेस सत्तेवर आल्यास महिला सक्षमीकरणावर भर देईल. शिक्षण व आरोग्य व्यवस्थेवरही आम्ही लक्ष केंद्रित करू,' असं आश्वासन त्यांनी दिलं. 'तुम्ही मोबाइलवर सेल्फी काढण्याची मजा घेता. पण त्यामुळं चिनी रोजगार मिळतो आहे. कारण, बहुतेक मोबाइल 'मेड इन चायना' आहेत. मोदी याला जबाबदार आहेत. रोजगार निर्मितीकडं त्यांनी दुर्लक्ष केलं आहे,' असा आरोप राहुल यांनी केला.