हे तर नरभक्षक!; आठवलेंची गोरक्षकांवर टीका

मटा ऑनलाइन वृत्त । अहमदाबाद

गोरक्षणाच्या नावावर देशभरात सुरू असलेल्या हिंसक घटनांचा केंद्रीय सामाजिक न्याय राज्यमंत्री रामदास आठवले यांनी तीव्र शब्दांत निषेध केला आहे. 'स्वत:ला गोरक्षक म्हणवून घेत लोकांना मारणारे गोरक्षक हे प्रत्यक्षात 'नरभक्षक' आहेत,' अशी तोफ आठवले यांनी डागली आहे.

विविध राज्य सरकारांच्या सामाजिक न्याय खात्यातर्फे आयोजित मेळाव्यात ते बोलत होते. 'गोरक्षणाच्या नावावर हिंसाचार करणाऱ्यांवर देशातील सर्व राज्य सरकारं कारवाई करत आहेत. लोकांवर हल्ले करणारे खरे गोरक्षक नाहीत, ते नरभक्षक आहेत,' असं आठवले म्हणाले. 'दलितांवर हल्ले होण्याच्या घटना यापूर्वीही घडल्या आहेत. हे प्रकार थांबण्यासाठी आंतरजातीय विवाहाला प्रोत्साहन देण्याची गरज आहे. केंद्र सरकारचं सामाजिक न्याय खातं त्या दृष्टीनं काम करत आहे,' असंही त्यांनी सांगितलं.

केंद्रीय सामाजिक न्यायमंत्री थावरचंद गेहलोत यांनीही याबाबत भूमिका मांडली. 'कायदा हातात घेणाऱ्यांची गय केली जाऊ नये, अशी पक्षाची व सरकारची भूमिका आहे. अशा लोकांवर कठोर कारवाई केली जाईल,' असं ते म्हणाले. उना येथे दलितांना झालेल्या मारहाणीची गुजरात सरकारनं वेगानं चौकशी करून पीडितांना न्याय मिळवून दिल्याची आठवणही त्यांनी दिली.