सेल्फी तू ना लें! सेल्फीचा आजार बळावतोय

मटा ऑनलाइन वृत्त । नवी दिल्ली

सेल्फीमुळे होणाऱ्या एका आजाराचे रुग्ण सध्या दिल्लीतल्या रुग्णालयात पोहोचत आहेत. 'ऑब्सेसिव्ह कम्पल्सिव्ह डिसऑर्डर' असे या आजाराचे नाव आहे. एम्स रुग्णालयात असे ३ रुग्ण आढळले आहेत. गंगाराम रुग्णालयात तर दर महिन्याला असे ४-५ टीनएजर्स उपचारांसाठी येतात. यात मुलींचे प्रमाण सर्वाधिक आहे.

सेल्फीच्या आजाराला अजूनही आजार म्हणून पाहिले जात नाही. त्यामुळे ६० टक्के महिलांना आपल्याला असा आजार आहे हेच ठाऊक नसते. एम्सचे मानसोपचार तज्ज्ञ डॉ. नंदकुमार म्हणाले, 'अलिकडेच एम्समध्ये सेल्फीसायटिसची समस्या आढळलेल्या तीन मुलींचा इलाज करण्यात आला. सेल्फीसायटिस अशी स्थिती आहे, ज्यात जर सेल्फी घेतला नाही किंवा जर तो फोटो सोशल मिडियावर अपलोड केला नाही तर अस्वस्थ व्हायला होते. यालाच 'ऑब्सेसिव्ह कम्पल्सिव्ह डिसऑर्डर' म्हणतात. सेल्फी काढायचा नाही असं ठरवलं तरी लोक स्वत:वर यात नियंत्रण ठेवू शकत नाहीत. आवश्यकतेपेक्षा जास्त सेल्फी काढण्याच्या सवयीला 'डिस्मॉर्फिक डिसऑर्डर' नावाचा आजार जन्म घालतो.'

या आजारात लोकांना वाटू लागते की ते चांगले दिसत नाहीत. सेल्फीची क्रेझ वाढल्यानंतर कॉस्मेटिक सर्जरी करणाऱ्यांच्या संख्येत वाढ झाली आहे. आपल्या रोजच्या कामात जर कोणत्या सवयीमुळे बाधा येऊ लागली तर ते 'ऑब्सेसिव्ह कम्पल्सिव्ह डिसऑर्डर'चे लक्षण असते.

गंगाराम रुग्णालयाचे मानसोपचार तज्ज्ञ डॉ. रोमा कुमार म्हणाले, 'आमच्याकडे दर महिन्याला असे ४-५ रुग्ण येतात. किशोरवयीन मुलींचे प्रमाण अधिक आहे. सेल्फी घेणे सामान्य बाब आहे, पण सतत सेल्फी घेणे हे व्यसन आहे.'