गुजरातमधील ज्येष्ठ काँग्रेस नेत्याचा राजीनामा

अहमदाबादः गुजरातमधील ज्येष्ठ काँग्रेस नेते विजय केल्ला यांनी ऐन निवडणुकीच्या तोंडावरच गुरुवारी पक्षाचा राजीनामा दिल्याने काँग्रेसला झटका बसला आहे. ‘काँग्रेसकडून विविध गटांच्या आणि समुदायांच्या नेत्यांनाच अधिक महत्त्व दिले जात असून, पक्षाच्या एकनिष्ठ कार्यकर्त्यांकडे दुर्लक्ष केले जात आहे,’ असा आरोप केल्ला यांनी पक्ष सोडताना केला आहे. येत्या काही दिवसांत भाजपमध्ये प्रवेश करणार असल्याचे केल्ला यांनी म्हटले आहे.

गेल्या ३८ वर्षांपासून काँग्रेसमध्ये असलेले विजय केल्ला हे गुजरात काँग्रेसचे रिलीफ कमिटीचे चेअरमन होते. यापूर्वी त्यांनी मणिनगर मतदारसंघातून निवडणूक लढवली होती. पक्षात एकनिष्ठ कार्यकर्त्यांना डावलले जात असल्याचा आरोप करीत त्यांनी काँग्रेसचे प्रदेशाध्यक्ष भरतसिंह सोलंकी यांच्याकडे राजीनामा सुपूर्द केला आहे. ‘पक्षात अनेक एकनिष्ठ नेते, कार्यकर्ते असताना पक्षाकडून पाटीदार समाजाचे नेते हार्दिक पटेल, ओबीसी नेते अल्पेश ठाकोर आणि दलित नेते जिग्नेश मेवाणी यांनाच अधिक महत्त्व दिले जात आहे.’